Hpyen Majan hpe ninghkap ai Shawa n-gun madun lamang galaw
Myitkyina muklum hta October praw, 6 ya shani Mungshawa mun mali jan daram Hpyen Majan hpe ninghkap ai shawa n gun madun, lam hkawm lamang galaw ai lam chye lu ai.
Shawa n-gun madun lamang hta Myitkyina muklum kata na mungshawa ni, Myitkyina hte ni nawn ai hpyenyen dabang hkan shanu nga ai mungshawa ni, Kachin mungmasa paty ni, NLD Party malawm ni, CSO ni,
Hpungyi ni, Mogawng mare, Namti mare, Waimaw mare, Mai Na mare, Awng Min Tar mare hte Jam Ga mare hkan na mungshawa ni sa du shanglawm ai lam na chye lu ai.
Mungshawa ni kawn Myen hpyendap kaw nna kachin ginra hte Myen mungdan ting hta hpyen htu shadut gasat gala nga ai lam hpe dawm jahkring na matu, Hpyen yen tsinyam hkrum nga ai mungshawa ni tinang a ginra de myit simsa ai hte wa nga lu na matu, Myen hpyen ni kawn mungshawa ni hpe shingyim ahkaw ahkang tawt lai ai lam ni lawan dawm jahkring na matu shawa n-gun madun ai re lam chye lu ai.
Shawa n-gun madun na matu jahpawt hkying 7:00am aten Shatapru manau wang hta shawa zup la nhtawm, Slg. Lung Jung Tu kaw nna lamang a lam tsun sanglang dan ai lam galaw nna shingni hpung ni kawn myit sharawt mahkawn hte rau du sa wa ai mungshawa ni hpe hkap hkalum ai lam na chye lu ai.
Hpawng hpe Mungdan mahkawn hkawn nna hpang wa ai rai nhtawm Hkristan makam hpung woi ni shaman ya ai hte, Anhte A Awng Padang Yehowa Karai Kasang ngu ai mahkawn hpe jawm hkawn nna, 9:00am aten kawn lam hkawm shawa n-gun madun ai lam galaw nhtawm shana maga hkying 2:00pm daram hta manau wang de angwi apyaw bai du shang wa nna tinang a buga ginra de bai nhtang wa sai lam na chye lu ai.
