Langai lang na Zai Wunpawng Kyokushin Karate Club a karate shingjawng poi lamang galaw

Langai lang na Zai Wunpawng Kyokushin Karate Club a karate shingjawng poi lamang hpe Zai Wunpawng Kyokushin Karate Club a lit hkam Sara Bwilap Ying Bawm kawn woi awn nna Myitkyina, Shata Pru Majoi Gawk Nu kaw September shata praw 6 ya jahpawt hkying 8:00am aten kaw nna shana hkying 7:00pm aten du hkra galaw lu sai lam chye lu ai.

Karate shing jawng poi galaw ai yaw shada lam hpe Sara Bwilap Ying Bawm ya na zawn tsun ai. “ Ya anhte wunpawng myusha ni maigan de shing jawng poi ni sa yang, shing jawng poi mahkrum madup nnga ai, anhte ni grai gaya gahpa hkrum ai majaw shing jawng poi mahkrum madup ra ti galaw ai gaw lam mi re, Ramma ni Club langai hte langai ganawn mazun lam, karate hpe grau myit lawm wa nna, jinghpaw mung kaw karate gin sup ai ramma ni grau law wa na matu, karate hpe gin sup ai law wa yang she ka-ni ya ni, ka-ni nanghpam ndai hpe ra ai ramma ni nnga wa na matu, madung gaw shanhte a myit masa ni hkrak wa na matu yaw shada nna galaw ai re” nga nna tsun ai.

Shing jawng poi hta asak apang garan nna shing jawng ai hta 6 ning, 8 ning hpe pang mi, 9 ning hte 10 ning hpe pang mi, 10 ning, 11 ning hpe pang mi, 12 hte 13 ning hpe pang mi, 13 ning hte 14 ning gaw la sha pang mi hte num sha pang mi, 14 ning, 15 ning pang mi hte 16 ning, 18 ning pang mi, pang 8 hku nna shing jawng ai lam chye lu ai.

Karate shing jawng poi hta Zai Wunpawng Kyokushin Karate Club a npu kaw na Morning club, Evening club, Galile hpyen yen, Putao hpyen yen border, Shata pru jahkrai jawng ni rai nga ai Club 5 kaw na jawngma ni yawng marai 132 shang lawm shing jawng ai rai nna Clud shagu, Pang shagu na Nambat lu ai jawngma ni hpe No. 1,2,3 hku nna masat shagrau ai lam chye lu ai.