Manmaw Ginwang KBC kawa la ni a Htunghking hte ginru ginsa labau, chyum laika sharin hpawng hte ta din shingjawng lamang galaw

Manmaw ginwang christan hpaji dap, la komiti kawn woi awn nna Manmaw ginwang KBC kawa la ni a Htunghking hte ginru gin sa labau, chyum laika sharin hpawng hte ta din shingjawng ai lamang hpe Manmaw ginwang Robert sa sana wang kaw September praw 9 ya shani manam zup rai nhtawm, September shata 10 ya shani kaw nna 14 ya sani du hkra galaw sa wa na re lam chye lu ai.

Sharin hpawng a yaw shada lam hpe Manmaw ginwang la hpu-awn Rev. Sumlut Gun Seng ya na zawn tsun ai. “Anhte kaw ndai kawa la ni na myit jasat manga nga ai hta na anhte makam masham a kawa ngu ai hpe mung shadip lu u ga matu, anhte grau nna myu a kawa ngu ai hta e amyu htunghking hpe makawp maga chye ai, grau nna amyu rusai labau hpe gawn chye, sawk sagawn hka ja chye ai, kawa la ni hpe e grau nna hkamja zet let ai kawa la ni byin tai lu na matu grau nna yaw shada ai lam re” nga nna tsun ai.

Kawa la ni a ta din shingjawng ai lamang ni hte kahpyawn nna htunghking hte ginru ginsa labau, chyum laika sharin hpawng ni hpe galaw ai lam re nga nna Sara matut tsun dan ai.

Sharin hpawng hta Chyum laika, tara jahprang laika hpe Manmaw ginwang na Saranum Jangma Lu Ra sharin ya na rai nna, Htunghking hte ginru ginsa labau hpe Kutkai chyum jawng na sharin sara rai nga ai Sara Njung Tu Hkawng kaw nna sharin ya na re lam chye lu ai.

Sharin hpawng hta Manmaw ginwang kata na buga hpung 43 kaw na kawa la ni yawng shang lawm sharin hkam la na rai nna, sharin hpawng hte ginsup ai lamang hpe shaning shagu galaw ai lam chye lu ai.