Catholic artists association ( CAA ) hpaw ninghtan ai laning mi hpring akyu hpyi hpawng hte hkum ra zuphpawng galaw

Kahtawlik shingni hpung ( CAA ) hpaw ninghtan ai laning mi hpring chyeju shakawn akyu hpyi hpawng hte hkumra zuphpawng hpe Myitkyina, San Pra lawk St.Gabriel nawku jawng wang kaw September shata 10 ya shani hkying 10:00am ten hta galaw la lu sai lam chye lu ai.

Kahtawlik shingni hpung hpaw ai Yaw shada lam hpe CAA Ningbaw Sara Sabaw Brang Tawng ya na zawn tsun ai. “Nawku hpung kata na shingni hta tsap ai ni hpe woi shing gyin ai lachyum re. Nkau ni gaw grai dam lada ai shing ni wuhpung kaba de sa na matu n gwi sa ai ni hpe tinang a ni htep ai nawku hpung kata na ni hpe shawng woi shing gyin nna, atsam rawng wa ai ni, kung hpan wa ai ni hpe kaba ai de bai sit sa na matu hte nawku hpung a magam bungli hta mung shingni wa nlawm nmai rai taw ai majaw dai zawn re kaw shamyet shing tau lu na matu yaw shada ai re” nga nna tsun ai.

Kahtawlik shingni hpung CAA hta sub komiti wuhpung hpan law law hpaw da lu sai rai nna, CAA hpaw hpang ai hpang laning mi laman hta nawku hpung hte seng ai poi lamang ni hte lak san poi lamang ni hta ap nawng daw jau shang lawm la lu sai lam chye lu ai.

Matut galaw sa wa na shawng lam masing hta, CAA shingni hpung sub komiti rai nga ai yu ngwi sub komiti, hkrang shala ai sub komiti, ka hkrang sub komiti ni hte kaga sub komiti hpan shagu na wuhpung shagu hpe shalat ai lam galaw sa wa na re lam chye lu ai.

Kahtawlik shingni hpung CAA hpe ( Peace Unity Hope With Harmony Music ) Simsa lam, myit hkrum lam, myit mada lam hpe lu la na ngu ai lashum ga hte nawku hpung a ningbaw ningla ni myit hkrum ai hte lai wa sai 2018 ning September shata praw 1 ya shani hpaw ninghtan da ai lam chye lu ai.

Hpawng lamang hta Wa Saradaw Francis Daw Tang, Wa Jau Kalang La Raw, Ma Ma Kaba Alam Ja Htu, Ma Ma Easter Hkawn Bawk, nawku hpung kanu kawa ni hte Shingni hpung hta shang lawm ai ni yawng marai 70 jan sa du shang lawm ai lam chye lu ai.

Photo: RVA