Chingmai hta Myen asuya hpyen dap kawn htu shadut htim gasat ai majan hpe dawm jahkring na matu shawa n-gun madun

Jinghpaw mung kaw Myen asuya hpyen dap ni htu shadut htim gasat nga ai hpyen majan hpe lawan dawm jahkring ya na matu, Thai mungdan du nga ai Kachin ni pawnghpawm nhtawm

October, 10 ya shani Chingmai muklum ( ျမန္မာေကာင္စစ္၀န္ ) rung shawng kaw shawa n-gun madun ai lam na lu ai.

Myen mung asuya nnan hte Daw Awng San Su Kyi hpe Jinghpaw mung na hpyen majan hte seng ai lam Myen asuya hpyen dap hpe tsun garum ya na matu hte Kachin ginra hta htu shadut htim gasat ai hpe tsep kawp dawm jahkring ya na matu shawa n-gun madun ai re lam chye lu ai.

Lai wa sai October, 1 ya shani Munggu ginwang, Puwang mare de Myen asuya hpyen dap ni sinat kaba gap bun ai majaw si sum mat ai Ma hte hkala hkrum nna tsi gawn lajang hkam nga ai Ma yen a matu asuya kawn lit la garum na matu hte Hpyen yen dabang hte seng ai garum ntum lu sha hte tsi mawan ni hpe pat hkum ai lam n galaw na matu shawa n-gun madun ai lam na chye lu ai.

Ndau laika hpe ( ျမန္မာေကာင္စစ္၀န္ ) rung de sa jaw ai rai tim hkap la ai lam n nga ai majaw laika sa pung hta bang dat sai lam mung chye lu ai.