Myitkyina Ginwang KBC Hkristan hpaji dap kawn woi awn nna Myo Rap Hpungtau sharin hpawng galaw

Myitkyina Ginwang KBC Hkristan hpaji dap kawn woi awn nna Myo Rap Hpungtau sharin hpawng hpe Myitkyina Muklum, Ziun buga Hkalup hpung nawku jawng kaw September shata 16 ya shani kaw nna 18 ya shani du hkra galaw na re lam chye lu ai.

Hpungtau sharin hpawng galaw ai yaw shada lam hpe Myitkyina ginwang hkristan hpaji dap hpu-awn Saranum kaba Tangbau Ja Kum ya na zawn tsun ai. “ Anhte Hpungtau ni nawku hpung kaw grau nna daw jau lu na matu, grau nna myit lawm ai hte sa sana magam bungli hta gun hpai lu na matu re” nga nna tsun ai.

Sharin sara ni gaw Mandalay kaw na Sara Nhkum Tawng La, Dap Kawng kaw na Saranum Hpaumye Hkawn Ba hte KBC Sara komiti hpu-awn Rev. Lahi La Ja ni hku nna sharin ya na re. Sharin gin hpan ga baw ni gaw Hkristan sak hkrung lam hte sut masa, Hkalup makam mashan hte kaba rawt wa ga hte Hpung tau ni a lit ngu ai ga baw ni hte 3 ya tup sharin sa wa na re lam chye lu ai.

Myitkyina ginwang hkristan hpaji dap kawn woi awn ai hte Hpungtau sharin hpawng hpe laning mi hta Rap 2 kaw galaw ai rai nhtawm, maning gaw Jaw Rap hte Yuzana Rap ni pawng nna galaw ai rai nna, dai ning gaw Myo rap hte Hugawng rap hpe garan nna galaw na re lam chye lu ai.

Myitkyina ginwang kata, Myo rap kaw nga ai buga hpung 33 kaw na Hpungtau ni yawng marai 300 jan sa du sharin hkam la nga ai rai nna, Myo Rap Hpungtau sharin hpawng hpe galaw ngut ai hpang, Hugawng Rap hpungtau sharin hpawng hpe mung matut nna galaw sa wa na re lam chye lu ai.