Myen Mung Asuya NRPC ni hte Dingdung daw rawt malan wuhpung 4 ni hkrumzup bawngban la lu

Myen Mung Asuya National Reconciliation and Peace Center (NRPC) ni hte Dingdung daw rawt malan Dap Hpawm wuhpung 4 ni rai nga ai KIO/KIA, ULA/AA, MNTJP/MNDAA hte PSLF/TNLA ni September 17 ya shani Kyeng Dong kaw hkrumzup bawngban la lu sai lam chye lu ai.

Laiwa sai August shata 31 ya shani hta myithkrum bawngban da ai lam ni hpe matut nna bawngban ai re. Ndai kalang na zuphpawng hta Myen hpyen dap de na dat kasa Salang ni mung sa du shang lawm bawngban ai lam chye lu ai.

Hkrumzup bawngban ai lam hta Bilateral Ceasefire Agreement ta masat htu na hte seng nna lawnglam 7 hpe myit hkrum bawngban jahkrup da lu ai hta, majan shayawm na lam, majan matut nbyin na lam, kyithkai  lam hte ganawn mazum tawn na lam, lahkawng maga rim ahkyak la ai zawn re ni hte seng ai lam, Dap shara jahkrat ai hte seng ai lam, hpyen yen ni tinang a buga de wa na lam hte NCA ta masat htu lu na matu myit hkrum bawngban la lu ai lam chye lu ai.

Hkrumzup bawngban hpawng hpe du wa na October shata hta matut bawngban sa wa na rai nna ndai lang na zuphpawng hta Myen Hpyen Dap kaw na lit nga ai Du Kaba ni hte Miwa Gumsan Mungdan Yunan Mungdaw na nanghpam pat jasan ginjaw lithkam Salang Gu Bawng woi awn ai dat kasa ni mung shang lawm ai lam chye lu ai.