Kokang MNDAA hte Myen Hpyen Dap ni gasat gala majan byin
Mungmyit Sinli Ga (Kachin Sub-state) KIA Dap Ba 6, Dap Nawng Dap Dung 36 ginra, Munggu Hpawng Seng Bang Satai kaw shara la nga ai Kokang MNDAA hpyen hpung ni hte Myen Hpyen Dapnu 99 kata na hpyen hpung ni September shata 19 ya jahpawt hkying 5 hte hkying 6 laman laja lana gasat gala majan byin ai lam na chye lu ai.
Myen hpyen hpung ni gaw Kokang MNDAA hpyen hpung ni nga ai shara de htu lung wa ai majaw gasat gala majan byin ai re lam, shawng lam na Salang langai tsun dan ai.
September shata16 ya shani hta mung, KIA Dap Ba 6, Dap Dung 9 ginra, Nam Hpalun Bum maga kawn pru wa ai Myen Dapnu 99 kata na hpyen n gun 60 daram hte Kokang MNDAA hpyen hpung ni Bang Gai Ja Maw lahta Bang Um Bum kaw gasat gala majan byin nna, September shata18 ya shani hta mung U Ra Bum kaw kalang bai gap hkat ai lam, ginra shi sawk ni kawn chye lu ai.
Rakhine Mung dingdung maga de mung AA hpyen hpung ni hte Myen Hpyen Dap ni shani shagu ngu na gasat gala majan matut manoi byin nga ai rai nna, Myen Hpyen Dap ni kawn nbungli hte mung wa gap gasat nga ai lam na chye lu ai.
September shata praw 9 ya shani hta Kokang MNDAA, Rakhine AA hte Balawng (Ta-ang) TNLA wuhpung 3 ni gaw September shata praw 9 ya shani kaw nna October shata praw 8 ya shani du hkra, gap hkat jahkring ndau shabra laika shapraw da ai lam nga ai.
September shata 17 ya shani hta mung, Kyeng Dong kaw galaw ai Myen Mung Asuya Simsa Lam Tam Hpung NRPC ni hte Dingdung daw rawt malan Dap Hpawm ni rai nga ai KIO/KIA, ULA/AA, MNTJP/MNDAA hte PSLF/TNLA na dat kasa salang ni hkrumzup bawngban ai hta gasat gala majan shayawm na hte lawng lam 7 hpe bawngban myithkrum da lu ai lam chye lu ai.
