Naushawng Community School hte Naushawng Development Institute a magam bungli hte hpaji shalat hkaw tsun hpawng galaw

Naushawng Community School hte Naushawng Development Institute a magam bungli ni hpe tsun jahpra dan ai hpaji shalat hkaw tsun hpawng hpe Laiza Muklum, Hkalup Hpung nawku jawng wang kaw September shata 20 ya jahpawt hkying 9:00am aten kaw nna shani hkying 11:00am du hkra galaw ai lam chye lu ai.

Daini na hkaw tsun hpawng hta Naushawng jawng a lam hte Naushawng Development Institute a magam bungli ni hpe Naushawng jawng na saranum Gauri Nang Nu hte Sara Brang Lat kaw nna tsun jahpra sang lang dan ai re.

Yaw shada lam hpe Naushawng jawng kaw na Research and Development Diperment Project Coordinator Saranum Gauri Nang Nu ya na zawn tsun ai. “Anhte Naushawng wuhpung wuhpawng Naushawng Development Institute a magam bungli ni hpe shachyen jahpra ya mayu ai hte anhte a 2020 ning na Naushawng Community School a jawng shawk form hpe shabra mayu ai rai nga ai. Ndai ginra hta hpa baw lam ni anhte mai wa garum na kun, mai wa ap nawng mai na kun, Naushawng wuhpung wuhpawng hku nna htawm e hpang e galaw sa wa ai rai yang ndai ginra kaw hpa baw lam ni ra kadawn nga ai kun, anhte Naushawng wuhpung wuhpang htawm e hpang e jawm galaw wa mai ai bungli ni hpe ma chye la mayu ai, naushawng wuhpung wuhpawng a mu ai ntsa kaw mungshawa ni a mu ai ningmu hpe chye la mayu hta la mayu ai majaw du sa ai re” nga nna tsun ai.

Naushawng jawng a yaw shada lam gaw anhte ginra nga ai ramma ni Yangon, Mandalay de nlu sa ai ni a matu, ndai ginra hta nga ai hpaji ni hpe ndai ginra hta lu la na matu rai nna jawng yu wa ai jawngma ni hku nna tinang a ginra hta bai wa apnawng lu na matu yaw shada let jawng hpe 2009 ning hta hpaw ninghtan da ai lam Saranum matut tsun ai.

Naushawng jawng hta Pre-Diploma program hte Diploma programs hpan 2 hku nna hpaw sharin ya ai re. Pre-Diploma program hta gaw Certificate in English lanquage and Social studies hpe sharin ya ai rai nna, Diploma program hta gaw sharin ginhpan 3 rai nga ai Diploma in Develoment studies, Diploma in political studies and Diploma in Education studies ni hpe sharin ya ai re. Pre-Diploma program hpe gaw Shatapru kaw nga ai Naushawng Learning Center kaw sharin ya ai rai nna, Diploma program hpe gaw Gaw Nan kaw nga ai Naushawng Community School kaw sharin ya ai re lam chye lu ai.

Pre-Diploma program hpe January shata kaw nna September shata du hkra, jawng yup jawng sha nre sha jawng lung ladaw 2, shata 8 rai nna jawng shang gumhpraw gaw lap sen 4 mun 9 ( 490,000 ) kyats re hte  Diploma programs hpe gaw January shata kaw nna December shata du hkra jawng yup jawng sha rai nhtawm, jawng lung ladaw laning mi, jawng shang gumhpraw lap sen 9 mun 3 ( 930,000 ) kyats re lam chye lu ai.

Naushawng community school kaw nhtoi 45 ya, nhtoi 10 ya na ai aten kadun Mungshawa lak chyoi ni hpe sharin ya ai rai nna, sharin hkamla na jawngma ni hpe hkawm sa hkawm wa jarik ni hpe hkam ya ai lam chye lu ai. Nhtoi 45 ya hpe gaw laning mi hta 3 lang galaw ai rai nna, nhtoi 10 ya na ai hpe gaw shata mi hta kalang galaw mat ai re lam chye lu ai.

Naushawng jawng hta asak 40 ning du hkra hkap la ai rai nna, amyu rusai, nawku hpung makam masham n lata ai sha shanglawt jawng tsang 10 awng ai ni hte Myen jawng tsang 10 awng sai jawngma ni yawng hpe hkap la ai re lam chyelu ai.

Nlu nlawm yak hkak nna hpaji hta kindut ai ni a matu Scorlarship program hpe mung mai shawk shawn ai hte jawngma dingsa ni hku nna jawngma nnan ni hpe garum madi shadaw jaw ai scorlarship ni mung nga ai re lam chye lu ai.

Daini na hpawng lamang hta saw shaga da ai magam gun kaji kaba hte ramma ni yawng marai 60 jan sa du madat hkam la ai lam chye lu ai.