Daini laika hti ai ramma hpawt ni na ningbaw ningla ngu ai gabaw hte laili laika hkaw tsun hpawng galaw

Daini laika hti ai ramma hpawt ni na ningbaw ningla ngu ai gabaw hte laili laika hkaw tsun hpawng hpe Ningshawng laika dum kaw na Sara Lapyaw Hkawng Ze woi awn nna Laiza Muklum, laiza lahta tsang jawng gawknu kaw September shata 20 ya jahpawt hkying 9:00am aten kaw nna shani hkying 11:30am aten du hkra galaw ai lam chye lu ai.

Laili laika hkaw tsun hpawng hta Hparat pang lai kaw na Journal Managing Editor Sara Kareng Tu Ja hku nna “Daini laika hti ai ramma hpawt ni na ningbaw ningla” ngu ai ga baw hpe mahta nna hkaw tsun dan ai lam chye lu ai.

Yaw shada lam hpe sara Lapyaw Hkawng Ze ya na zawn tsun ai. “Anhte jawng Sara, jawngma ni yawng hkra gaw laili laika hta myit maju jung ai hte laika hti ai ngu ai nam chyim hpe hkrawn hkrang lu na matu hte shawng lam myit shingran sawn shapraw chye lu na matu, jawng sara ni mung tinang kata na laika sha nre, shinggan na laili laika ni hpe mung byin mai ram hti hka ja nna jawngma ni hpe grau myit shing ran ning mu kaba hte lu sharin achyin ya lu na matu hte jawngma ni, sara ni yawng hkra laika dum hpe mahkri shawn ai byin tai shangun mayu ai. Ndai laika dum hpe mahkri nshawn yang anhte a myit masa ni shinggyim wuhpung wuhpawng hta ganawn mazum ai lam ni ningra wa ai re majaw laika dum hpe mahkri shawn yang she laika hti ai yaw shada lam ni, ningmu nnan ni hpe myit sawn lu na matu hte laika dum hpe mahkri shawn lu na matu yaw shadan let galaw ai re” nga nna tsun ai.

Hkaw tsun hpawng hta laiza lahta tsang jawng, laiza lahpran tsang jawng hte Nawng e hku sa sana jawng kaw na jawng sara saranum ni hte jawngma ni yang marai 500 jan sa du madat hkam la ai lam chye lu ai.