Hpyen yen shalan shabran yu ngwi pinra lamang galaw na
Wunpawng yu ngwi shingni hpung ni kaw nna hpyen yen ni hpe shalan shabran ai yu ngwi pinra lamang hpe September shata 29 ya shana hkying 8:00pm aten hta Kasung mare hpyen yen ni nga ai Namti Lambraw Yang, RCM. Hpyen yen dabang kaw galaw na re lam chye lu ai.
Yaw shada lam hpe yu ngwi shingni hpung kaw na yu ngwi ninghkring Lahkri Htu Shan ya na zawn tsun ai.
“Anhte myusha ni matsan mayan rai taw nga ai ten n kau ni n chye na nna hpyen yen ni hpe amyu myu nga tsun ai, shada tsawra myit madun hkat ra ai ngu hpe n kau mi chye na ai nga ai zawn n chye na ai ni mung nga ai re. Anhte myusha ni gaw tinang na dum nta U, Wa, yamnga yawng kabai kau da nna masha ni jaw ai garum ai sha, hkam la nna myit kaji garen nga ra ai. Anhte mung n lu n su ai raitim hpyen yen kaw n shang lawm shi ai ni gaw gade mi matsan jam jau ai nga tim, hpyen yen ni hta nga yang loi tsamai ai le, dai majaw ja gumhpraw lu ai ni gaw ja gumhpraw sa jaw, yu ngwi lu ai ni gaw yu ngwi hte n-gun jaw ai, lu wa ai gumhpraw ni hpe lap mi mung nla ai sha yawng shanhte hpe bai jaw da ai, anhte lu ai atsam hte maga mi hku nna sha pi sa garum ai rai ga ai” nga nna tsun ai.
Hpyen yen ni a hkam sha ai lam yakhkak jamjau lam ni hpe yu ngwi hte shalan shabran ya nna, yu ngwi hte ja gumhpraw ni hpe garum ya lu na matu, yu ngwi shingni hpung ni kaw nna shanglawm apnawng daw jau let yu ngwi hte sa shalan shabran n-gun jaw ai re lam, hpyen yen ni hpe yu ngwi hte shalan shabran n-gun jaw ai lam ni hpe matut nna galaw sa wa na masing nga ai lam, yu ngwi ninghkring Lahkri Htu Shan matut tsun ai.
Hpyen yen shalan shabran yu ngwi pinra lamang hta shang lawm mahkawn na yu ngwi ninghkring shayi shadang ni gaw Ah Sar, Z. Je Nyoi, Lahpai Nu Tawng, Lahpai La Ja, Labang Doi Wawm, M. Lang Bawm, Nkoi Tu Hkawng, Pahkawn Tu Nan, Nahkang Nan Daw, Lahkri Htu Shan, Shagyi La Awng hte Maran La Doi ni sa du shangwi shapyaw na re lam chye lu ai.
Yu ngwi pinra lamang hpe lai wa sai August shata 18 ya shana hta gaw Namti Lambraw Yang KBC hpyen yen camp kaw galaw ai rai nna, September shata 29 ya shana gaw Namti Lambraw Yang RCM hpyen yen camp kaw bai galaw ai re lam chye lu ai.
Hpyen yen shalan shabran yu ngwi pinra lamang hpe lai wa sai 2018 ning kaw nna galaw hpang ai rai nna, Tanghpre hpyen yen, Namti Lambraw Yang hpyen yen, Trinity hpyen yen, Waimaw hpyen yen, Manghkring hpyen yen hte Manmaw hpyen yen shara ni hta Hpung garan ginghka ai lam nnga ai sha, sa du shangwi shapyaw lai wa sai lam chye lu ai.
