Sinpraw Majoi Htunghking Shingni hpung, Ningpawt Ninghpang hpyen hpaji wunkat yu hpawng lamang galaw

Sinpraw Majoi Htunghking Shingni hpung, Ningpawt Ninghpang hpyen hpaji wunkat yu hpawng lamang hpe Laiza Muklum Manau wang, Sinpraw Majoi gawknu kaw October shata praw 1 ya jahpawt hkying 7:00am aten hta galaw ai lam chye lu ai.

Shawng nnan sharin lai wa sai hpyen hprim ni hpe madun ai lam galaw ai. Daihpang Nawku hpung woi sara ni kaw nna akyu hpyi ya ai rai nna, Du Kaba Lahpai Zau Tang hku nna chyeju dum ga hpe tsun nhtawm training sharin sara, saranum ni hpe chyeju dum masat masa kumhpa jaw ai lam galaw ai.

Sinpraw Majoi Htunghking Shingni hpung, hpaw sa wa ai yaw shada lam hpe Sinpraw majoi Htunghking Shingni hpung hta yu gawn lajang lit la taw nga ai, Ginjaw Htunghking hte laili laika magam dap, sawk gin makan dap a Matsun Du Nding Tawng Ra ya na zawn tsun ai. “Yaw shada lam gaw anhte wunpawng amyusha ni a manu dan ai Htunghking ginru ginsa labau lam ni hpe matut manoi gin len nna, mat mat wa hkyen ai ni hpe bai sawk gin tawn da ai hte maren, sawk gin da ai ni hpe gin shalat wa ai lam de du hkra galaw mat wa lu na matu yaw shatawng shada da ai lam ni nga ai sha n-ga, dai hpe yawng hkra anhte a mungshawa masha ni, amyusha ni grau nna hkawn hkrang chye na wa lu na matu, ndai zawn re shingni ka manawt ai hku nna mung anhte ni madun dan ra ai ngu ai hpe hkam la ai a majaw, ka manawt ai hku, mahkawn hku, yu ngwi hku mung anhte a manu dan ai Htunghking hte seng ai ni hpe shawa masha ni hpe madun dan sa wa na, galoi mung nmat mat hkra myit kraw lawang kata hta hkam la nna yawng hkra chye na mat wa na ngu ai hpe myit mada yaw shada ai hte ka manawt hpung hpe hpaw sa wa ai lam re” nga nna tsun ai.

Daini gaw hpyen ningpawt ninghpang wunkat jawng yu hpawng rai nga ai. Ndai hpyen hpaji hpe hpa majaw sharin ai ngu ai shaloi gaw hpyen hpaji yawng hpe anhte sharin ai nre, madat mara ai hte tara hpe chye hkungga ai, rit kawp ni hpe chye hkungga ai ni tai nna grau madat mara let myit hkrum mang rum tsun ai lam ni hpe chye galaw hkam la ai shayi shadang sha ni byin tai wa na matu hte matut nna shanhte hpe woi awn ai lam, sharin shaga ai lam hta loi na matu ndai wunkat ni hpe anhte la shangun ai lam re nga nna Saranum kaba matut tsun dan ai.

Sharin ladaw gaw 3 ning rai nna, ndai 3 ning laman hta Music Hpaji ni, wunpawng sha ni a madum hta mahta nna madum sumhpa ni hpe mungkan madang dep chye wa hkra sharin ya na re hte Miwa ga, Miwa laika, Htunghking galaw lu galaw sha ai lam ni, Hkam la nna jai lang ai wunpawng amyusha ni yawng a Htunghking ni, ka manawt ai, yu ngwi, hte kaga galaw lu galaw sha ai lam ni, Buhpun palawng, Mawn sinli ai lam, shadu lu shadu sha ai magam bungli ni yawng hpe hkum hkra sharin ya na ngu myit mada let yaw shada da ai lam ni nga ai re lam chye lu ai.

Htunghking Shingni hpaji wunkat hpe August shata praw 2 ya shani kaw nna hpaw hpang ai rai nna, Htunghking shachyen shaga ai lam ni hte ningpawt ninghpang hpyen hpaji ni hpe shawng nnan sharin hpang ai re hte sa du sharin hkam la nga ai jawngma ni yawng marai 38 tup re lam chye lu ai.

Ka manawt ai hte seng ai ningpawt ninghpang gawng shakyang ai, hkum hkrang hpe lasaw lasa ni hpe gara hku shaman shakyang ai lam ni hpe shata 2 ram galaw taw nga sai rai nna, grau nna kung kyang wa lu na matu Miwa Gumsan mungdan de mung, ningpawt ninghpang ka manawt ai gawng shakyang hpaji hpe sa du sharin la na masing nga ai re lam chye lu ai.