Sama Ginwang KBC Ramma gawdin shingjawng lamang galaw

Sama Ginwang KBC Ramma gawdin shingjawng lamang hpe Bansa Ziun mare uphkang gawdin pa kaw September shata 30 ya shana daw hkying 2:00pm aten hta gawdin ginsup hpang sai lam chye lu ai.

Gawdin ginsup ai yaw shada lam hpe Sama ginwang ramma komiti lit hkam Sara Daroi Jaw Gun ya na zawn tsun ai. “Anhte ginsup ai hte karai kasang a hpung shingkang hpe shadan shadawng lu na matu, hkamja zet let ai hpung masha ni byin tai wa lu na matu, Myit galu kaba ai hte tara hkan ai hpung masha ni byin tai wa lu na matu, Buga camp shagu na hpung masha ni anhte hka bra mat ai grai law sai re majaw shada da grau nna hku hkau ganawn mazum gahkyin gumdin let sa sana magam bungli hta myit mang hkrum let jawm galaw sa wa na hte buga ginwang mungdaw mungdan a arawng sadang hpe pawn ba shadan shadawng lu ai ginsup ninghkring ni gawdin ninghkring paw pru wa lu na matu myit mada yaw shada let gin sup hpang wa ai re” nga nna tsun ai.

Sama ginwang kata, buga hpung 10 kaw na ramma ni shang lawm shingjawng ai rai nna, gawdin round hku nna shingjawng ai lamang hpe October shata 12 ya shani du hkra galaw sa wa na re hte gawdin shingjawng ai hta ninggang gashaun ai, gin chyum dat ai lamang hpe gaw October shata 16, 17 ya maga de lak san hku nna galaw sa wa na re lam chye lu ai.