Hpung Party Majat Hkaja Hpawng galaw
Ninggawn Daju Party Komiti kawn woi awn galaw ai Hpung Party Majat Hkaja hpawng hpe Laiza Alen Bum Hpaji Jawng Kaw October shata praw 2 ya shani kaw nna 3 ya shani du hkra galaw na re lam chye lu ai.
Yaw shada lam hpe Alen Bum Lahta Tsang Sharin Saranum, Ningtau Jawng Up Saranum kaba Hkangda Ja San Li ya na zawn tsun ai. “ Hpung Party hte seng ai hpe grau nna chye na hkawn hkrang na matu, ya nkau mi gaw party shang dat jang hkrit ra ai kun nga ai baw shingdu de na mabyin ni hpe ma anhte nchye ai, party shang dat ai a majaw, party shang ai masha ni a akyu hkam sha lam ni gara maga de rai wa lu ai ngu baw ni, atsawm nchye ai majaw nshang ai law ai majaw ndai hpe chye na hkawn hkrang jang she anhte jawngma ni, magam gun ni mung hpung party ngu gade ram ahkyak ai ngu hpe chye nna hpung party de shang nna, myusha ni a magam bungli hta shang tsap wa lu hkra ngu ai yaw shada lam re” nga nna tsun ai.
Madung woi hkaja ai lam ni gaw, Gaw da ai tara na lam, Hpung party ngu ai gaw ganing re hpe re ai, hpung party shang ai masha gaw ganing re ni rai ra ai, hpung party shang ai masha gaw ganing re akyu ni hpe hkam sha wa lu na ngu ai lam ni hpe tsun sang lang dan ai lam Saranum matut tsun ai.
Hpung party hte seng nna ningmu atsawm nhpaw shi, nhkawn hkrang shi ai ni grai law ai majaw, magam gun sara, saranum nnan ni mung party a lam hpe atsawm nchye shi ai law ai rai nna, tsang 10 lung taw ai jawngma ni mung law malawng gaw asak 18 ning a lahta de na ni sha rai sai majaw, hpung party ngu ai hpe hkawn hkrang ra ai, party shang na nshang na ngu ai hpang daw she re, hpung party ngu gade daram ahkyak ai, gara hku shang lawm ra ai ngu ai lam ni hpe yawng atsawm sha chye na hkawn hkrang da ra ai re majaw, ndai zawn hpung party majat hkaja hpawng galaw ai re lam chye lu ai.
Hpung party majat hkaja hpawng hpe shaning shagu galaw ai rai nna, dai ning na hpung party majat hkaja hpawng hta Alen Bum lahta tsang jawng na asak 18 ning a lahta na tsang 10 jawngma ni hte magam gun jawng sara/saranum ni yawng marai 200 jan sa du madat hkam la ai lam chye lu ai.
