8th lang na Waimaw ginwang KBC Ramma shawa sharin hpawng galaw na hkyen
Waimaw ginwang Hkalup hpung ginjaw a 8th lang ngu na Waimaw ginwang KBC Ramma shawa sharin hpawng hpe Muk Chyit, Waimaw chyumjawng wang kaw October shata 14 ya shani manam zup nhtawm, October shata 15 ya shani kaw nna 18 ya shani du hkra galaw na re lam chye lu ai.
Yaw shada lam hpe Waimaw ginwang Ramma hpu-awn Sara Zaidan Bawm Ying ya na zawn tsun ai. “Karai kasang a mungga hta na awmdawm ai amyu, mungdan hpe gaw gap lu ai ni rai wa lu na matu, 4 ning hta kalang, ramma shawa ganawn mazum hpawng de let, myit hkrum gahkyin gumdin nga na matu, KBC Hkalup makam masham hta ngang grin sadi dung ai ramma ni tai nga na matu hte karai kasang a mungga hte myit masin, wenyi, hkumhkrang, machye machyang ni su hprang rawt jet wa ai ramma ni tai nga na matu re” nga nna tsun ai.
Sharin ga baw ni gaw Awmdawm ai amyu mungdan hpe gawgap ai ramma, Timohti laika, Hpaji ningli laika, KBC Hkalup makam hkring htawng, Kachin a byin nga masa hte tara masa lam, Ramma hte Hkristan dinghku, shawng lam shingran kaja hte prat hpe gaw gap ai ramma, ramma hte christan lai len ni hpe sharin ya na re. Special Talk hku nna KBC ramma magam dap a shawng lam masing/ ramma ni a tsap shara, WBA ramma magam dap a shamu shamawt lam/ sharin hpawng hte seng ai lam ni hpe tsun jahpra dan ai lam ni galaw na re lam chye lu ai.
Sharin sara ni gaw Waimaw kaw na Dr. Galau Sau Bawm, Waimaw Chyumjawng Up Rev. Htawshe Dau Hkawng, WTS Hpaji Up Saranum Gunhtang Nang Htang, KBC Ramma hpu-awn Sara Jangmaw Nan Hpung, WBA Ramma hpu-awn Sara Zaidan Bawm Ying, Pyin Oo Lwin kaw na Rev. Maran Hkun San, KTCS Trustee ningbaw Rev. Labya Paul Naw Tawng, Tara kasa MKA Saranum kaba Nbrang Doi Bu, KTCS na Sara Ningrang Tu Nan, Sut Du Qidnang Ze Lum, KTCS na Saranum kaba Maru Nang Hkam ni shayin ya na re lam chye lu ai.
Sharin na lamang ni gaw jahpawt shagu nawku daw jau ai ten ni hta Karai Kasang a mungga ( Bible Study ) lamang ni, Mungga lak jet ( Lecture ) hku nna Kachin a byin nga masa ni, daini na hpaji masa ni, kyang lai len masa ni hpe lak jet hku nna sharin hkam la ai lamang ni, lak san n-gun jaw ga ( Special Talk ) lamang ni hte Mahkawn shakawn ai ( Praise and Worship ) lamang ni galaw na re lam chye lu ai.
Laksan lamang ni gaw October 14 ya shana hta du sa wa ai ramma ni hpe hkap hkalum la ai, hkap tau ka hkrang lamang ni, October 15 ya shana hta atsam madun lamang hte group hte group shing jawng ai lamang ni galaw na re. October 16 ya shana hta ka hkrang shingjawng ai lamang ni galaw na re hte October 17 ya shana hta gaw yu ngwi pinra lamang ni galaw na rai nna, laga ginsup ai lamang hta Social game, num/la tadin, gawdin shingjawng ai lamang ni mung galaw na re lam chye lu ai.
Sharin hpawng hta Waimaw ginwang kata buga hpung shagu na ramma ni sha n-ga, buga ginra shara shagu hta nga ai ramma shawa ni yawng sa du shang lawm mai ai lam chye lu ai.
