Mung masha marai ( 2 ) hpe Myen hpyen hpung ni rim woi mat

Mung Myit Sinli Ga ( Kachin Sub-State ) ginra Kutkai Ginwang, Loi Seng mare kaw shanu nga ai Shd. Ulai La Tawng ( Asak 30 ning ) hte Shd. Zahe Hawng Dau ( Asak 23 ning ) yan hpe Myen hpyen dap Tatma ( 99 ) na hpyen hpung ni October, 17 ya shana

daw hkying 1:00pm aten hta mare kata na rim woi mat ai lam chye lu ai.

Loi Seng mare makau kaw October, 16 ya shani gasat gala byin ai rai nna, October, 17  ya shani dum N-ta kaw nga taw ai shadang yan hpe Myen hpyen la ni gaw Du Jum wa hte hkrum ngut ai hpang bai wa sa na nga nna shaga woi mat wa ai re lam chye lu ai.

Rim hkrum ai yan hpe bai dat ya na matu seng ang ai mare Salang ni October, 18 ya shana daw hkying 4:30pm aten hta sa tsun ai shaloi မံုးစီးဗ်ဴဟာ Dap Dung de woi mat wa nna dai yan gaw Ku Kang hte Rahkai hpyen hpung ni hpe lu sha hte kun rai ni gun dut sa ya ai yan re ngu mara shagun nhtawm Gumhpraw hte sa shaw la yang she dat ya na re ngu tsun ai hpe mung chye lu ai.