Ramma hte mungmasa ningmu jahpaw hkaw tsun hpawng galaw na hkyen
KSPP ( Kachin State People’ s party ) ramma komiti ni woi awn nna, Ramma hte mungmasa ningmu jahpaw hkaw tsun hpawng hte Myitkyina gaiwang ramma komiti hpaw ninghtan ai lamang hpe Myitkyina Muklum, Shatapru manau wang Majoi Gawknu kaw October shata 11 ya shani kaw nna 12 ya shani du hkra galaw na re lam chye lu ai.
Hkaw tsun hpawng hpe October 11 ya shani galaw na rai nna, October 12 ya shani gaw Myitkyina gaiwang na ramma komiti hpe hpaw ai lamang galaw nhtawm, Democracy ladat hte ra lata nna Myitkyina Muklum gaiwang ramma magam dap hpe gaw gap sa wa na re lam chye lu ai.
Hkaw tsun hpawng hta Rev. Dr. Hkalam Samson kaw nna Youth and Religious Freedom hte seng ai hpe hkaw tsun dan na re, Sara Labya Jaw San Naw hku nna Youth and Federalism hte seng ai hpe hkaw tsun dan na rai nna, Sara Hangkum Lum Zawng hku nna Youth and Politics hte seng ai hpe hkaw tsun dan na re hte Saranum Seng Nu Pan kaw nna mung Youth and Freedom of Expression hte seng ai lam hpe hkaw tsun dan na re lam chye lu ai.
“Yaw shada lam gaw Myo ginra hta nga ai ramma ni yawng mungmasa ningmu hpe atsawm sha chye chyang nna, daini anhte kaw byin wa na galai shai ra ai lam ni hpe yawng hkra zinlum ai hte lu galai shai hkra ngu ai yaw shada lam hte ningmu jahpaw hkaw tsun hpawng hpe galaw ai re lam” Sara Jan Hkung tsun ai.
Myo mare de nga ai ramma ni a matu, mungmasa ga baw hte mungmasa hte seng nna hpawng chyawm na shara langai mi gaw wunpawng myusha ni myit hkrum ai hte nga ra ai ngu ai hta yawng hkra madi shadaw nna KSPP hpe hpaw da lu sai re majaw, ramma ni yawng mung myo ntsa kawn mungmasa hpe gawgap nna anhte a ahkaw ahkang lu hkra galaw wa ai ten hta KSPP Youth ngu ai kaw yawng hkra shang lawm nna ahkaw ahkang lu hkra, anhte a mungdan hpe gaw gap sa wa ga nga nna Sara matut tsun ai.
Ramma hte mungmasa ningmu jahpaw hkaw tsun hpawng hpe ndai kalang gaw Myitkyina Muklum kaw galaw ai rai nna, matut nna Potao, Manmaw, Waimaw, Manje, Mungmau, Chihpwi, Saw Law hte Danai ginra shara shagu hta galaw sa wa na masing nga ai lam chye lu ai.
