13th lang na Uru Seng Maw ginwang a KBC la ningbaw ningla sharin hpawng galaw
Uru Seng Maw ginwang la magam dap kaw nna woi awn ai hte 13th lang ngu na KBC la ningbaw ningla sharin hpawng hpe Ginsi Buga kaw October shata 9 ya shani kaw nna 10 ya shani du hkra galaw na re lam chye lu ai.
Sharin hpawng galaw ai yaw shada lam hpe la magam dap hpu-awn Rev. Sabaw Tu Hkawng kaw nna ya na zawn tsun ai. “ Ya na ten anhte amyusha ni myit hkrum lam, makam masham lam hta galu kaba wa nna, myit hkrum kahkyin gumdin let, karai ra ai kawa la ni tai nna, karai kasang a hpung shingkang hpe shadan shahkung lu na matu yaw shada ai re” nga nna tsun ai.
Sharin hpawng hta KBC Ningbaw Rev.Dr. Hkalam Samson kaw nna “daini na byin da masa hta Hkalup makam hte amyu mungdan hpe gaw gap woi ai ningbaw ningla” ngu ai ga baw hte sharin ya ai rai nna, KBC Amu Madu Rev. Hpauyawng Tu Mai hku nna “Karai myitra ai lam hkan let dinghku hpe woi awn ai kawa” ngu ai ga baw hte sharin ya ai re hte Seng Tawng Buga Sinpraw mare hpung kaw na Sara Palawng Seng Myat Naw kaw nna Special Talk hku nna sharin ya ai lam chye lu ai.
Sharin hpawng hpe shaning shagu galaw ai rai nna, sharin hpawng hta Uru Seng Maw ginwang kata na buga hpung 26 hte lak san ginra 3 kaw nga ai kawa la ni yawng marai 500 jan sa du sharin hkamla ai lam chye lu ai.
