TNLA hte Myen Hpyen Dap ni gasat gala majan byin ai majaw mungshawa marai 7 hkra hkala
TNLA hpyen hpung ni hte Myen Hpyen Dap ni October shata praw 9 ya jahpawt hkying 6:30am aten daram hta Sinli Muklum gat makau kaw gasat gala majan byin ai majaw, mungshawa marai 7 laknak kaba pala hkyep hkra hkala ai lam, buga masha ni kawn chye lu ai.
Hkala hkrum ai mungshawa La marai 3 hte Num marai 4 yawng marai 7 re. Machyi masha ni hpe gaw ya aten Sinli mungshawa tsi rung hta tsi tsi hkamla nga ai rai nna marai 2 hpe gaw Lashio tsi rung de sa da ai lam chye lu ai.
Gasat gala majan byin ai majaw mungshawa ni a dum nta kaw laknak kaba si wa hkrat kapaw nna dum nta nkau hten mat ai sha n ga nta masha jawn modo hkan mung pala hkyep hkra mat ai lam nga ai.
Myen hpyen modo 7 hpung ni gaw, TNLA hpyen hpung ni nga ai shara de hpyen shamu shamawt htu lung wa ai majaw, TNLA hpyen hpung ni hkap shingla gap dat ai kawn gasat gala majan byin ai re lam, TNLA shiga lawk kaw na chye lu ai.
