Ginjaw Komiti Tingnyang Up Malai, Dap Awn Daju a mungga madat hkamla zuphpawng galaw
KIO Ginjaw Komiti Tingnyang Up Malai, Dap Awn Daju a mungga madat hkamla zuphpawng hpe October shata 11 ya jahpawt hkying 9:30am aten kaw nna hkying 11:45am aten du hkra, Alen Bum Lahta Tsang Jawng (Dumhpawng Zup) kaw galaw ai lam chye lu ai.
Du Daju Jum, Gunhtang Gam Shawng (Ginjaw Komiti Tingnyang Up Malai, Dap Awn Daju) kaw nna, Je Yang, Hpun Lum Yang hpyen yen dabang na kanu kawa ni hte Jawng Sara/num, jawngma ni hpe, “Myutsaw masa ngang grin ra ai mahtai hte makam masham ngang grin ra ai mahtai” ngu ai ga baw kaba lahkawng hpe la kap nna mungga jaw ai lam galaw ai re.
“Shawoi anhte hpe ndai zawn rai na CS hku nna mungga jaw yu ai lam gaw nnga shi ai. Ya na zawn anhte mungshawa ni hpe mungga sa jaw ai majaw grai kabu n gun lu ai” nga nna hpawng hta sa madat shang lawm ai Je Yang Dabang Shim Komiti Ningbaw Salang Lahtaw Gum Ja tsun ai.
KIO Tingnyang Up Malai, KIA Dap Awn Daju a mungga madat hkamla hpawng hta du sa ai Je Yang, Hpun Lum Yang hpyen yen dabang na kanu kawa ramma ni hte Jawng Sara/num jawngma ni yawng marai 1700 jan sa du madat hkamla ai lam chye lu ai.
