Kutkai Muklum hta Hpyen majan hpe ninghkap ai shawa n-gun madun lamang galaw

Lahta Sammung ( Kachin Sub-State ) ginra, Kutkai muklum hta  October,  21 ya shani, hpyen  majan hpe ninghkap ai shawa n-gun madun lam hkawm lamang galaw ai lam chye lu ai.

Lamang hpe Kutkai muklum mungshawa ginsup pa hta yawng zup la nhtawm hkying 8:00am aten kawn 11:00am aten du hkra “Mungdan kata byin nga ai dinghku majan jahkring na matu, Rudi amyu sha ni shimlum lam lu na matu, Simsa ai hte hpaji sharin lu na matu,

Hpyen yen mung masha ni hpe garum ntum dawm ai lam jahkring na matu, Ma kaji hte shayi num ni shim lam lu na matu, Kasu kabrawng nchyun shanang ai lam ni hpe ninghkap na, Mung shawa ra sharawng ai lam awng ra na” ngu marawn let Kutkai Muklum hpe n-gun madun lam hkawm shing grup ai lam chye lu ai.

Ndai lamang hta anhte Wunpawng amyu sha ni sha n-ga Sam, Miwa, Gala, Balawng amyu sha ni mung shang lawm ai hte yawng marai 2,000 jan shang lawm ai hpe chye lu ai.

Manmaw Ginwang, Nmawk Muklum hta mung hkying 7:00am aten kawn အရပ္ဘက္ အေျချပဳလူထု အမ်ိဳးသမီးအဖြဲ႔ ni woi awn let Jinghpaw Mungdaw kata htim gasat majan kalang lata jahkring na matu hte Simsa lam ra sharawng ga ai, Shayi num sha ni a shimlum lam lu na matu ngu marawn, pyen dau sharawt let  shawa n-gun madun lamang galaw ai hpe mung chye lu ai.