TNLA, MNDAA ni hte Myen hpyen hpung gasat gala majan byin
Mungmyit Sinli Ga (Kachin Sub-state) Kuthkai Gaiwang, Masa Ganhtang mare makau kaw Ta-ang (Palaung) TNLA hpyen hpung ni hte Myen Hpyen Dap, Dapnu (Tatma) 99 kata na hpyen hpung ni October shata 16 ya jahpawt hkying 6:00am aten kawn hkying 7:30am aten du hkra, gasat gala majan byin ai lam, Kuthkai buga masha ni kawn chye lu ai.
Kuthkai Muklum kaw dap jung nga ai Myen Hpyen Dap ni mung majan byin ai shara de laknak kaba hte gap bun ai lam, ginra shisawk ni tsun ai.
Dai hpawt hkying 7:00am aten daram hta mung, Munggu Hpawng Seng Tadwi mare hte Namwa (Palaung) mare lapran kaw Kokang MNDAA ni hte Myen hpyen hpung ni gasat gala majan byin ai. Myen hpyen ni gara dap re gaw atsawm hkrak n chye shi ai, lai wa sai aten hta gaw Dapnu (Tatma) 99 ni shamu shamawt hkawm ai re, nga nna shawng lam kaw nga ai Salang langai tsun dan ai kawn chye lu ai.
