Manje Muklum, Kawng Ra lawk kaw K.S.P.P party a rung hpaw, pyendau (Signboard) sharawt poi galaw la lu
Manje ninghtawn Manje Muklum, Kawng Ra lawk 2 hta nga ai Salang Kumreng Awng a dum nta wang kaw October shata 19, bat 6 ya shani hkying 11:50am aten kawn hkying 2:20pm aten du hkra, Kachin People’s Party (K.S.P.P) a Rung hpaw, pyendau (Signboard) sharawt poi lamang hpe galaw la lu sai lam chye lu ai.
“Rung hpaw poi lamang hta Dr. Manam Tu Ja (KSPP Ningbaw) hte komiti malawm ni yawng marai 11 sa du shang lawm ai. K.S.P.P Ningbaw wa kawn party a lam hpe tsun sanglang dan nhtawm, Jinghpaw Mung hta nga ai mungchying mungshawa yawng hkra gaw ndai K.S.P.P kaw hkrai sha, Me bang ga dai shaloi she anhte a Mungdaw hpe Hluttaw hte tara masa yawng hkra kaw lu tek da na re” nga nna tsun ai lam, hpawng hta sa lawm ai Salang langai tsun ai.
Ndai October shata 25-26 ya hta mung K.S.P.P ramma komiti kaw nna, Manmaw Muklum, deng 2 Aung Myin Thar Catholic nawku jawng wang hta hkaw tsun hpawng galaw na lam mung tsun da ai, nga nna Salang wa matut tsun ai.
K.S.P.P a rung hpaw, pyendau (Signboard) sharawt hpaw poi lamang hta Manje Muklum kata na nawku hpung woi sara ni hte kanu kawa ni yawng marai 40 tup sa du shang lawm ai rai nna, hpunau Sam amyusha ni hpe mung saw shaga da ai raitim, n sa shang lawm ai lam chye lu ai.
Dai hpawt hkying 9:00am aten hta mung Manmaw Muklum, ေျခာက္လကုန္း lawk na Salang Wadu Munghkawng a dum nta wang kaw K.S.P.P a rung hpaw, pyendau (Signboard) sharawt ai lamang hpe galaw la lu ai lam chye lu ai.
