DGA hpaw 50 ning hpring ginsup poi hpaw hpawng lamang galaw
Wunpawng Mungdan Shanglawt Asuya, Mungchying Uphkang Dap Department of Genneral Administration (DGA) hpaw ai 50 ning hpring chyeju shakawn hpawng hpe madi shadaw ai ginsup poi hpaw hpawng lamang hpe October shata 27 ya shana maga hkying 2:00pm aten kaw nna hkying 3:00pm aten laman Laiza Muklum, Zup Awng Simsa Gawdin Pa kaw galaw ai lam chye lu ai.
N gun jaw shatsam mungga hte ginsup ai a yaw shada lam hpe Salang Kaba Maji Naw Mai (Shabyin Shatai Komiti Ningbaw) kaw nna ya na zawn tsun ai.
“Wunpawng Amyusha ni hte Wunpawng Mungdan masha ni hpe amyu kaba lailen hte dip up sai chyup da hkum ai kaw nna lawt lu na matu, mungshawa rawt malan majan gasat sa wa ai hta Wungpawng Mungdan Shanglawt Asuya gaw 1962 ning hta Mungchying Uphkang Dap hpe hpaw hpang dat sai re. Dai Uphkang Dap hpe yu reng uphkang sa wa na matu 1969 ning June, July shata laman hta hpawng ai ginjaw hpawng hta Mungchying Uphkang Dap DGA Rung hpe hpaw shabawn dat sai rai nna, dai ning 2019 shaning hta 50 ning hpring sai majaw, Karai Kasang a chyeju hpe shakawn shagrau ai hte magam bungli hta apnawng shakut shaja woi awn lai wa sai ningbaw ningla hpu shawng hpu ba ni hpe masat masa galaw ai kyuhpyi poi shingra hpe hkap tau hkalum madi shadaw ai ginsup poi lamang re.
Yaw shada lam (1) Wunpawng Mungdan Shanglawt Asuya Ginjaw Rung DGA hpaw ai 50 ning hpring chyeju shakawn kyuhpyi lamang hpe hkap tau hkalum madi shadaw ai. (2) Wunpawng Amyusha ni hte Mungdan sha ni a arawng ningsang hpe shatsaw sharawt ya ai ginsup ninghkring ni law law shangai shaprat sa wa lu na matu. (3) Tinang kungkyang ai lam hpe pawng hpawm nna wuhpung wuhpawng hku mi rai rai, dinghkrai hku mi rai rai mai kaja lam hta shingjawng mayu ai myit masa rawng ai ramma ni law law byin paw pru wa na matu. (4) Nanghpam malu masha koi gam kau nna, hkamja zet kungkyang atsam ningja hpring tsup ai ramma shayi shadang sha ni law htam wa na matu. (5) Ramma ni shada da grau nna kahtawng langai hte langai dabang langai hte langai myit hkrum kahkyin gumdin makyit sumri ngangkang ai hku nna kanawn mazum sa wa na matu. (6) Ndai ginsup poi galaw ai a marang e, hpyen yen dabang hkan nga ai mungchying mungshawa ni, ramma shayi shadang sha ni myit daw myit hten ai lam nnga ai amyusha shanglawt lam magam bungli hta shachyen shaja sa wa lu na matu re” nga nna tsun ai.
Ginsup hpan ni gaw, Gawdin, Tadin, Ka din, U mun, Golf, Marathon, Ndan gap, Lahpaw gap shingjawng ginsup hpan yawng 14 re. Gawdin hpe October 27, laban shana de kaw na ginsup hpang sai, Tadin, Ka Din hte U mun ni hpe gaw October 28 ya shani kaw na ginsup hpang na, Marathon ginsup ai lam hpe, November shata praw 2 ya jahpawt hkying 5:00am aten hta ginsup na, Golf ginsup ai hpe gaw November shata praw 7-8 ya shani hta ginsup sa wa na re lam, Salang Kaba Lasi Naw Htoi Ja (Ginsup Komiti Ningbaw) tsun ai.
Gawdin ginsup ai wuhpung ni gaw, Laiza lawk (1) lawk (2) lawk (3) lawk (4) lawk (5), Mung Seng Yang, Je Yang hte Hpun Lum Yang ni rai nna, dai na de ginsup ai gaw Laiza lawk (1) hte lawk (4) ni ginsup ai hta lawk (4) ni goal 3-1 hte dang mat ai. Ninggang gashun ai hpe gaw November shata 10 ya shana de hkying 2:00pm aten hta ginsup na re lam chye lu ai.
Mungchying Uphkang Dap DGA hpaw ai 50 ning hpring wunli la chyeju shakawn hpawng hpe du wa na November shata 14 ya shani Laiza Muklum Sinpraw Majoi Gawknu kaw galaw nhtawm, 15 ya shani gaw DGA Hpung Wa Gawknu kaw galaw na re hpe mung chye lu ai.
