Myen hpyen hpung ni Munshawa ni hpe mara kata rim woi mat ai hte galaw lu galaw sha lam hkum pat da
KIA Dap Ba ( 3 ) npu, Dap Dung ( 27 ) ginra hta shamu shamawt hkawm nga ai Myen hpyen dap Hk.M.Y ( 437 ) na hpyen hpung ni November, praw 1 ya jahpawt hkying 8:30am aten, Nam Hkam mare na U Thein Nyut hpe mara kata rim woi mat ai lam chye lu ai.
November, praw 2 ya jahpawt hkying 9:00am aten hta mung Muse makau Maw Tawng mare kaw Myen hpyen hpung ni mare kata na Mungshawa ni a Dum N-ta ni hkan sawk jep hkawm nhtawm
N-ta masha ni hpe Mying jahpan, Mungchying masat hte sumla ni dem la ai lam chye lu ai. Dai zawn Myen hpyen dap ni shamu shamawt hkawm nga ai majaw Mungshawa ni galaw lu galaw sha lam, hkawm sa hkawm wa lam yak hkak nga ai hpe mung na chye lu ai.
Lai wa sai October, 3 ya shani hta mung Man Wing lahta KIA Dap Dung ( 27 ) ginra Man Chyam hte Mawun lapran Mawun kadawng kaw Myen hpyen dap Hk. L.Y ( 56 ) na hpyen hpung ni Slg. Maru La Gawng Asak ( 58 ) ning hpe gap sat kau da nna Man Wing Gyi kaw du nga ai Myen hpyen dap Hk.M.Y ( 602 ) na hpyen hpung ni mung Buga masha, Hpyen yen Mungshawa ni hpe nam de kadai n sa lu na ngu hkum pat da ai majaw, ya du hkra Yi, Sun galaw lu galaw sha n mai mat ai lam na chye lu ai.
