DGA hpaw 50 ning hpring Ja jubeli hpe hkaptau ai Gawdin ninggang gashun lamang hte ginsup poi ginchyum dat hpawng galaw
Mungchying Uphkang Dap, DGA hpaw ninghtan ai 50 ning hpring Ja jubeli hpe hkaptau ai Gawdin ninggang gashun lamang hte ginsup poi ginchyum dat hpawng hpe November shata 10 ya shana de hkying 4:00pm aten hta Laiza Muklum, Zup Awng Simsa Gawdin Pa kaw galaw ai lam chye lu ai.
Gawdin ninggang gashun ai hpe Mung Seng Yang Gawdin hpung ni hte Laiza Lawk 2 Gawdin hpung ni ginsup ai hta Laiza Lawk 2 ni goal 1-0 hte Gawdin ninggang hpe lu mat ai re. Ginsup lamang kaw wuhpung hku ginsup ai hte dinghkrai hku nna ginsup ai hta nambat 1,2,3 lu ai ginsup ninghkring ni hpe kumhpa shagrau ai lam galaw ai.
Ginsup ginchyum dat shatsam mungga hpe Salang Kaba Labya Tang Gun (Mungchying Uphkang Dap Lithkam) kaw nna tsun ai hta, “Mungchying Uphkang Dap 50 ning hpring jubeli chyeju shakawn masat dingsat ginsup poi hta shanglawm lu ai gaw, Karai Kasang a man hta dawng pru ai lam re. Myit dik myit pyaw let Karai Kasang a chyeju hpe shakawn ga. Labau hta arawng la ga” nga nna n gun jaw shatsam mungga tsun ai.
Matut nna Salang Kaba kaw nna sha, Mungchying Uphkang Dap 50 ning hpring chyeju shakawn jubeli poi galaw ai a lachyum hpe matut tsun ai hta, (1) Dinghta ga e kalang mi amyu sa pra sai ni gaw, tinang a lamu ga hta tinang a ahkaw ahkang, tinang a htunghking, aga laili laika hte ndut ndang nga pra galu kaba wa ra ai re. (2) Karai Kasang a mungga hte maren nga pra galu kaba wa ai amyu hpe dip shingdang da ai lam gaw, dai amyu hpe roi ai sha nrai Karai Kasang hpe nan shut ai lam mung rai nga ai. (3) Dai kaw na lawt lu hkra bai rawt malan ai bungli gaw Karai Kasang tawn da ya ai tara re. nga nna tsun ai.
Ja jubeli hpe hkap tau ai ginsup lamang hta Gaw din, Ta din, Ka din, U mun, Marathon, Golf hte kaga ginsup hpan yawng 14 rai nna, lai wa sai shata October 27 ya shana de ginsup hpang ai hte ninghtoi 15 ya tup ginsup ai re lam chye lu ai.
