Namhkai hka mahkrai makau hte Namrak hkaraw kaw gasat gala majan byin
Mungmyit Sinli Ga (Kachin Sub-state) KIA Dap Ba 4, Dap Dung 8 ginra, Namhkai hka mahkrai makau hte Bum Sumshi (Loi Sam Sip) pa Man Nawng Balawng mare shingdu Namrak hkaraw kaw Myen Hpyen Dap, Dapnu (Tatma) 99 kata na hpyen hpung hte TNLA hpyen hpung ni, November shata 17 ya shani hta shara 2 kaw gasat gala majan byin ai lam chye lu ai.
Dai na hkying 6:00pm aten daram kaw nna hkying 7:30pm aten laman Man Nawng Balawng mare shingdu Namrak hkaraw kaw gap hkat ai shara de, Kutkai kaw nga ai Myen Hpyen Dap ni, laknak kaba hte gap bun ai lam, shawng lam na Salang langai shana wa ai kaw na chye lu ai.
November shata 15 ya shani, Chyukme maga gasat gala majan byin ai hta Myen Hpyen Dap ni gaw, majan gap nbungli 2 hte wa htim gasat ai, laknak kaba hte mung 11 lang gap bun ai lam, TNLA shiga lawk hta tsun da ai.
TNLA hpyen hpung hte Myen hpyen dap ni shani shagu ngu na gasat gala majan byin nga ai sha n-ga Rakhine Mung, dingdung daw ginra ni hta mung, Arakan Army (AA) ni hte Myen Hpyen Dap ni laja lana gasat gala majan byin nga ai lam na chye lu ai.
