Namtau, Kyukoke Pangsai, Wandin Kapna buga 3 a 25 ning hpring jubilee fund tam show lamang galaw na
Mungmyit Sinli Ga (Kachin Sub-state), Mungmau Ginwang, Namtau Buga, Kyukoke Pangsai Buga hte Wandin Kapna Buga 3 a 25 ning hpring jubilee chyeju shakawn hpawng a matu, musie komiti ni woi awn nhtawm fund tam show lamang hpe November shata 21, bat hpang 4 ya shana hkying 7:00pm aten hta Kyukoke Pangsai nawku jawng wang kaw galaw na re lam chye lu ai.
Ndai fund tam show lamang hta shanglawm ai yu ngwi ninghkring ni gaw, Rev. Gam Awng, Dashi Gun La, Sumlut Naw, Gawlu Seng Hkawn, Chyin-yu Tu Seng, Dashi Doi La, Lahpai Nang San, Awn, hte laksan hku nna Nhkum Brang Tawng, Nang Seng Mun, Maru Hkawn Ra, Nhkum Zau Nan ni re.
Fund tam show galaw ai a yaw shada lam hpe Kyukoke Pangsai buga na Hpung Up, Rev. Hpauwung Brang Nan (Poi shabyin shatai amu madu) kaw nna tsun ai hta “December kaw chyeju shakawn hpawng manau nau na de a matu fund tam ai langai, lahkawng gaw DVD sumla shapraw na matu, masum gaw shaman ai lam re” nga nna tsun ai.
Du wa na December shata hta gaw Kyukoke Pangsai buga, Namtau buga hte Wandin Kapna buga 3 a 25 ning hpring jubilee chyeju shakawn manau hte ginlung Hkristmas hpe mung galaw sa wa na re lam chye lu ai.
Mi gaw Namtau, Kyukoke Pangsai, Wandin Kapna ni buga langai sha rai nga ai. Dai hpe 1994 ning hta buga garan dat ai ya gaw 25 ning hpring sai majaw buga 3 pawng nna chyeju shakawn hpawng galaw ai re. Namtau, Kyukoke Pangsai, Wandin Kapna buga na lam amyu myu a majaw kaga buga de htawt nga mat ai ni, chyeju shakawn manau mung nga ai re majaw ndai shiga na ai hte ni nawn tsan ai ni yawng hkra sa du shanglawm na matu saw shaga dat ai lam, Rev. Hpauwung Brang Nan tsun ai.
25 ning hpring jubilee chyeju shakawn hpawng hpe December shata 24 ya shani manam zup, 25 ya shani ginlung Hkristmas hte shana daw manau lamang, 26 ya shani jubilee chyeju shakawn hpawng hte manau, 27 ya shani hta manam bya na re lam chye lu ai.
