Ma ni hkrum sha nga ai mayak tsin yam ni hpe hparan hpareng ai garum ningtum ni hpang de shalai lam hte seng ai bawngban hpawng galaw

Jinghpaw Wunpawng Hkalup Hpung KBC hte Plan Myanmar ni pawng nna Ma ni hkrum sha nga ai mayak tsin yam ni hpe hparan hpareng ai, karum ningtum ni hpang de shalai lam hte seng ai bawngban hpawng hpe November shata 19 ya jahpawt hkying 9:00am aten hta Laiza Muklum, Shawnglam Mungmasa Jasat Hpung (SMJH) zuphpawng gawk kaw galaw ai lam chye lu ai.

Bawngban hpawng galaw ai a yaw shada lam hpe KBC-HDD (Humanitarian Development Department) hta Ma ni hpe woi awn taw ai Center Manager Saranum Lanam Chang Myaw kaw nna ya na zawn tsun ai.

“Dai ni na lamang gaw camp kata shing nrai makau grup yin mare buga kaw rai yang gaw, Ma ni a ruyak tsin yam hpe gara hku hparan na, bai na Laiza Muklum kata kaw nga taw nga ai INGO, NGO ni wuhpung wuhpawng ni hku nna, Ma ni a mayak tsin yam ni hpe gara organization gaw hpa baw hpan hpe mai garum ai ngu ai hpe jawm bawngban ai. Ndai ni hpe service jaw lu ai provender shapraw la nna law malawng kadai ni hpe mai garum hpyi ai ngu ai hpe shapraw let, camp na ni hpe chye shangun ai, camp na ni mung ndai Ma ni hpe kadai gaw hpa baw ni garum taw nga ai ngu ai hpe lawan ladan aten dep garum hpyi mai na matu yaw shada ai re” nga nna tsun ai.

Bawngban hpawng hta, IRRC, Ginjaw Hkamja Dap, Ginjaw Hpaji Dap, Mungchying Uphkang Dap, Laiza Balik Dap, KWA, HPA, KDG, RANIR, Metta, KRDC, MSF, Arrawady, DRC, Municipal, Immigration, Wan Sat Makan Dap, Shiga Magam Dap, Woi Chyai Camp, Je Yang Camp, Hpunlum Yang Camp na lit nga ai ni hpe shaw shaga nna galaw ai lam chye lu ai.