Je Yang dabang hta Ninggawn Mungmasa hkaja hpawng galaw

KIO Ginjaw Ginra, Ginwang Ginjaw shara, Je Yang hpyen yen dabang catholic nawku jawng hta November shata 27 ya shani kaw nna 30 ya shani du hkra, Ginwang Ginjaw Komiti ni woi awn nhtawm, ninggawn mungmasa hkaja hpawng galaw ai lam chye lu ai.

Sharin ya ai Sara gaw Salang Kaba Labang Doi Pyi Sa (Ningtau Ninggawn Amu Madu) re.

Salang Kaba kaw nna tsun ai hta, hpung pati ngu nna hpaw ai kaga amyu ni kaga Mungdan ni law law nga ai, hpa hpe madung tawn nna hpaw ai ngu nga ai. Shanglawt Hpung Pati gaw nambat langai Myutsaw masa, lahkawng Democracy masa, masum Mungshawa ngamu ngamai masa, ndai gaw Shanglawt Hpung a madung nhpawt nhpang tara re.

Kaga chye ging chye mai ai lawng lam ni hpe mung sharin ya nga ai.

Hpawng lamang galaw ai a yaw shada lam hpe Du Kaba Labawng Gam Rip (Ginjaw Ginra, Ginwang Ginjaw Komiti Amu Madu) kaw nna ya na zawn tsun ai.

“Hpung pati ngu gaw Wunpawng Mungdan Shanglawt hpung shang masha ni hte mungchying mungshawa hkum ding dek chye ra ai hpung pati langai mi re. Dai re majaw hpung pati hte seng nna garai nhkawn hkrang ai ni hpe hkawn hkrang wa na matu yaw shada na galaw ai bungli ni re”

Hpawng hta Je Yang dabang hta shanu nga ai, KIO pati hpung shang salang majing ni, shingnan hpung shang salang ni hte pati garai nshang ai kanu kawa ramma ni yawng marai 200 jan sa du madat hkamla nga ai rai nna, November shata 30 ya shani gaw pati hpung shang majing ni hpe ga shaka (Oath) jaw ai lamang hpe mung galaw na re lam chye lu ai.

Ninggawn mungmasa hkaja hpawng hpe Je Yang dabang kaw galaw ngut ai hpang Hpun Lum Yang dabang hta mung matut galaw sa wa na re hpe mung chye lu ai.