Amyu shayi ni ntsa mazut roirip ninghkap lamang galaw

Laksan Laiza Muklum Amyu Shayi Komiti ni woi awn nhtawm, Amyu shayi ni ntsa mazut roirip ninghkap lamang hpe December shata praw 2 ya jahpawt hkying 7:30am aten kaw nna shani ka-ang hking 11:30am aten du hkra, Laiza Muklum kata kaw lam hkawm shawa n gun madun lamang galaw ai lam chye lu ai.

Lam hkawm shawa n gun madun ai hta Amyu Shayi ni hte hkawn ji ni a ntsa mazut roirip ai lam hte kunrai shatai ai lam (hkring),

Dinghku kata amyu shayi ni hpe mazut roirip ai lam (ninghkap ai),

Amyu shayi ni hpe makawp maga ai lam hta (shanglawm ga),

Amyu shayi ni a shanglawm lam hpe (masat masa galaw ga) nga nna shawa nsen marawn ai lam galaw ai.

Lam hkawm ai hpe Seng Lu Ma shapan jawng shawng kaw nna, Laiza Muklum kata na lam kaba ni hta shinggrup hkawm ai rai nna, laiwa laisa mungshawa masha ni hte Modo, Cycle ni hpe mung jahkring la nna Mahtat sumri (ရင္ဒူး) shakap ya ai lam galaw ai.

Lamang galaw ai a yaw shada lam hpe Laksan Laiza Muklum Amyu Shayi Komiti Amu Madu Saranum Nhkum Htu Nan kaw nna ya na zawn tsun ai.

“Mungkan Mungdan shara shagu mung dai ni gaw, Amyu Shayi ni hpe mazut roirip ai lam hta e, ninghkap ai masat ninghtoi rai nga ai. Dai majaw anhte Laksan Laiza Muklum ni mung ndai lam hpe anhte shang lawm ga ai, hpa majaw shanglawm ai nga yang anhte Wunpawng Mungdan kata kaw mung, anhte myushayi ni hpe mazut roirip ai, hpa lachyum npru ai kaw dang sha ai, Ma kaji ni hte mahkawn kasha ni hpe hkum hkrang hte roirip ai lam ni mung nga ai. Ndai zawn re ni hpe mung anhte shawng lam hta mat mat wa lu na matu anhte yaw shada ai lam rai nga ai”

Lai wa sai aten hta myushayi hpung ginjaw kawn woi awn nna galaw ai lam law law nga sai. Dai ning 2019 December shata hta Laksan Laiza Muklum Amyu Shayi ni hku nna kalang bai lit la nna galaw sa wa ai lam re. Du wa na shaning hta mung matut galaw sa wa na lam nga ai. Ding yang mai byin ai ladat hku nna masat n htoi du wa shagu galaw sa wa na lam nga ai, nga nna Saranum matut tsun ai.

Lam hkawm ninghkap shawa n gun madun hpawng hta Amyu shayi ni yawng marai 90 jan shang lawm ai lam chye lu ai.

Ndai zawn re ninghkap lamang hpe Mungkan Mungdan shara shagu hta November shata 25 ya kaw nna, December shata 10 ya laman shinggyim ahkaw ahkang lamang hte seng ai shamu shamawt lam galaw ai hpe chye lu ai.