Ginjaw Rung Party Komiti kata Amyu Shayi Sub-komiti ni woi awn nna Amyu shayi marai shajat Sap bya hte U shan shadung galaw sharin ai wunkat galaw

Ginjaw Rung Party Komiti kata amyu shayi sub-komiti ni woi awn nna amyu shayi marai shajat Sap bya hte U shan shadung galaw sharin ya ai wunkat hpe Laiza Muklum, KRDC rung kaw December shata 21, 23 lahkawng ya tup galaw na re lam chye lu ai.

Yaw shada ai lam hpe KRDC rung magam gun rai nga ai, Ginjaw Rung Party Komoti Amyu shayi Sub-komiti a ningbaw rai nga ai Saranum Lahpai Htu Raw ya na zawn tsun ai. “Ginjaw Rung Party Komiti kata kaw nga nga ai anhte amyu shayi ni shada zin lum na matu hte amyu shayi ni a machye machyang marai sharawt ya ai re, machye machyang sharawt ya ai ngu ai hta lata hpaji sha n ga kaga ningmu ni, mung masa, sut masa, hkamja lam ni yawng rai nna, anhte ni ndai hpaji ni hpe sharin la nna, tinang a mare bu ga de bai wa ai shaloi tinang a dinghku kata, wuhpung wuhpawng kata kaw bai jai lang sa wa lu na matu sha n ga gaja nan myit lawm nna sharin hkam la ngut yang sut masa lam hku nna mung mai galaw lu na matu, hkamja lam hte bung pre ai arung arai ni hpe chye gin shalat lang na matu hte amyu shayi ni shada da hku hku hkau hkau ganawn mazum lu na matu re” nga nna tsun ai.

Wunkat hpe Sarama Hpauyu Htoi Bu kaw na sharin ya na rai nna, madung gaw Sap bya hte Ushan shadung galaw ai lam hpe sharin ya ai re lam chye lu ai. Ndai zawn sharin ya ai lamang hpe No.( 1 ) lang ngu na galaw hpang ai rai nna, matut manoi galaw sa mat wa na masing nga ai re lam chye lu ai.

Wunkat hta shang lawm ai Amyu shayi ni gaw Ginjaw Rung Party Komiti kata na rai nga ai KIOCC, KIC, KRDC, Amyu shayi hpung ginjaw rung hte Ramma woi komiti ( KIO ) rung kata hta magam gun nga ai  amyu shayi ni yawng marai 16 tup sa du sharin hkam la ai lam na chye lu ai.