Namtau, Kyukoke Pangsai, Wandin Kapna buga 3 a 25 ning hpring jubilee chyeju shakawn manau hte ginlung Christmas galaw
Mungmyit Sinli Ga (Kachin Sub-state), Mungmau Ginwang, Namtau Buga, Kyukoke Pangsai Buga hte Wandin Kapna Buga 3 a 25 ning hpring jubilee chyeju shakawn manau hte ginlung Christmas hpe Kyukoke Pangsai nawku jawng wang kaw December shata 25, 26 ya shani galaw ai lam chye lu ai.
Buga 3 a 25 ning hpring jubilee chyeju shakawn hpawng galaw ai lam gaw lai wa sai 25 ning hta buga langai sha re majaw, buga langai kaw na buga masum rai nna bai maden wa ai marang e galu kaba wa ai karai kasang a chyeju hkamla ai, karai kasang a chyeju hpe shakawn ai rai nna, maga mi de anhte a myit hkrum ai lam hpe grau nna gahkyin gumdin ai lam hpe shadan shadawng ai lam re nga nna Rev.Hpauwung Brang Nan tsun ai.
25 ning hpring jubilee chyeju shakawn hpawng hta laksan lamang hku nna Manau nau ai lam, shana yu ngwi machyan ni hte kahkrang hte ka manawt ai lam hpe galaw ai lam chye lu ai.
Chyeju shakawn hpawng hta Miwa gumsan mungdan, Yangon, Kutkai ginwang, Mungmau ginwang kaw na mungshawa ni yawng marai 3000 daram sa du chyeju shakawn lawm ai lam na chye lu ai.
