KBC ramma komiti ni woi awn nhtawm, Maw Hpawng Ramma ni a ginsup shingjawng ai lamang galaw
KBC ramma komiti ni woi awn nhtawm, Maw Hpawng ramma ni a ginsup shingjawng ai lamang hpe Maw Hpawng Masat ( 1 ) jawng gawdin pa kaw December shata 27-28 ya shani galaw ai lam chye lu ai.
Ginsup lamang galaw ai gaw Ramma ni grau nna Nanghpam hpe tawn da let, ginsup ai hpan hta shanglawm ginsup wa ai shaloi, ba hkam hkra rai yang nanghpam ni hpe tawn da wa ra ai re majaw, nanghpam hpe koi yen kau nna ramma ni buga hpung hta wu wu di di rai shanglawm wa let, ramma ni shada da langai hte langai ganawn mazum ai hta e grau nna magyep hkap hkra, hkamja zet let ai ramma ni byin wa hkra ngu yaw shada let galaw ai re lam Shadang Lahpai Zau Seng Naw tsun ai.
Ginsup lamang hta Ta din num/la, Fusel num/la, Ka din, Sumri gang hte laga uhpung ginsup hpan ni lawm na hte, lamang hta buga kata kaw na ramma ni lawk hte lawk shang lawm shingjawng ai lam chye lu ai.
Shagrau hkumhpa hku nna No.1 kumhpa lu ai lawk ni hpe Ninggang hte gumhpraw Kyats.100000 ( Sen mi ), No.2 kumhpa lu ai lawk ni hpe gumhpraw Kyats. 70000 ( Mun sanit ), No.3 kumhpa lu ai lawk ni hpe gaw gumhpraw Kyats. 60000 ( Mun 6 ) hte No.4 hkumhpa lu ai lawk ni hpe gumhpraw Kyats. 50000 ( Mun 5 ) hku nna masat shagrau jaw na re hpe chye lu ai.
Ginsup lamang hpe shaning shagu galaw ai rai nna, matut nna mung grau hkrak hkra galaw sa wa na masing nga ai lam ginsup komiti ni tsun shana wa ai kaw na chye lu ai.
