Shaning ninghpaw chyeju shakawn wunli la akyu hpyi hpawng galaw
2020 shaning ninghpaw chyeju shakawn wunli la akyu hpyi hpawng hpe January shata praw 1 ya jahpawt hkying 7:00am aten hta Laiza Muklum Padang Rung Gawknu kaw galaw ai lam chye lu ai.
Hpawng lamang hta Rev. Sumlut Gun Seng kaw nna hpawng hpaw akyu hpyi ya ai hpang, 2020 shaning ninghpaw shakram mungga hpe Ginjaw Komiti Tingnyang Up, Du Daju Jum Nban La kaw nna shatsam mungga hti dan ai.
Sara kaba Columban Lasang Tu San kaw nna mara raw akyu hpyi ya ai, Rev. Abraham Sai La Rip kaw nna 2019 shaning tup hkamla lu sai chyeju nlang hpe shakawn kyu hpyi ya ai.
Rev. Kumtsan Naw Ra kaw nna 2020 shaning ting a matu “Dai Nlang” shaman wunli la akyu hpyi ya ai, Rev. Chyang-maja Tu Shan kaw nna Karai Mungga hte htawn tsun n-gun jaw ya ai.
Shaning ninghpaw akyu hpyi hpawng hta ningbaw kaba hte Ginjaw Komiti Salang ni, Magam Dap, Makan Dap shagu na lit nga ai Salang ni yawng marai 80 jan sa du shang lawm ai lam chye lu ai.
2020 shaning ninghpaw chyeju shakawn wunli la akyu hpyi hpawng hpe Laiza Muklum Sinpraw Majoi Gawknu, Ja Htu Bum Lawt Gindai Gawknu, Ginwang Ginjaw shagu hte Dapba shara shagu hta mung galaw ai lam chye lu ai.
