Shaning ninghpaw n-gun awai ginsup lamang galaw
Ninggawn Daju Party Komiti ni woi awn nna 2020 shaning ninghpaw n-gun awai ginsup lamang hpe Laiza Muklum, Laiza Golf Club kaw January shata praw 2 ya shani galaw ai lam chye lu ai.
2020 ning shaning ninghpaw n-gun awai hpaw hpawng lamang hpe Wunpawng Mungdan Shanglawt Hpung Ginjaw Komiti Tingnyang Up Ningbaw Kaba kaw nna lam masan ya ai hte maren Ninggawn Daju Party Komiti kaw nna masing jahkrat ai hte woi awn ginsup ai re.
“Mungchying mungshawa ni hte Magam Dap, Makan Dap shagu na magam gun ni shaning tup Karai Kasang a chyeju hpe hkamla lu ai hte 2020 ning hta Karai Kasang lam woi ai hte myit mang yaw shada ai mungdan magam bungli hpe awng dang ai hku galaw la lu na matu yaw shada ai lam re” nga nna Laksan Laiza Muklum Party Komiti Tingnyang Up, Laksan Laiza Muklum Uphkang Du, ginsup poi lamang a shabyin shatai komiti ningbaw Salang Kaba Sabaw La Zau tsun ai.
Ginsup poi lamang hta mungchying mungshawa kaji kaba yawng shang lawm ginsup ai rai nna, ginsup hpan ni gaw gam chyam ai lam, Nam Man shadaw lung ai lam, Meter 100,200 kagat shingjawng ai lam, Hpri tawng hpri pa kabai shingjawng ai lam, Sumri gang ai lam, Muk sha shingjawng ai lam, Modo taya kaw gawdin htawng bang ai ginsup hpan ni re hpe chye lu ai.
Dai ni na ginsup lamang hta Woi Chyai hpyen yen dabang, Hpun Lum Yang hpyen yen dabang, Je Yang hpyen yen dabang hte Laiza Muklum kaw na Mungchying mungshawa ni yawng hte ginjaw shimlam hpyen hpung ni, Hpyen Du Shalat jawngma ni, Magam Dap, Makan Dap shagu na magam gun ni yawng marai 6000 daram sa du shang lawm ai lam chye lu ai.
