72 lang na Jinghpaw Mungdaw masat ninghtoi lamang galaw na
Manmaw Ginwang Wunpawng Shingni Hpung ni woi awn nna, 72 lang na Jinghpaw Mungdaw masat ninghtoi lamang hpe Manmaw Htunghking manau wang kaw January shata praw 9 hte 10 ya shani 2 ya galaw na re lam chye lu ai.
Mungdaw masat ninghtoi galaw ai a yaw shada lam hpe Manmaw Ginwang Wunpawng Shingni Hpung a ningbaw Maran Seng Hpa ya na zawn tsun ai.
“Ya na ma ni Jinghpaw Mungdaw nhtoi galoi ten gara shata gade ya shani nga pi nchye ai grai law mat wa sai sha n-ga, myusha lam yan hkan mung grai hkrat sum mat wa ai lam grai law sai re majaw, poi galaw dat ai a marang e langai hte langai yawng hkra myit hkrum ai hte bungli ni hpe jawm galaw sa wa lu na matu yawng hkra hkrum zup lu na matu re” nga nna tsun ai.
Mungdaw masat ninghtoi hta Manau nau ai lam, Num/la Futsal gawdin ginsup shingjawng lamang, Num/la Marathon shingjawng lamang, Table tennis shingjawng lamang, ka hkrang lamang, yu ngwi pinra lamang hte Gamung lanya lamang ni mung lawm na re.
January shata praw 10 ya jahpawt hkying 7:00am aten hta Myusha Dawnghkawn sharawt ai lamang ni galaw na rai nna, manau nau ai lam hpe January shata praw 9 hte 10 ya shani 2 ya tup nau na re lam chye lu ai.
72 lang na Jinghpaw Mungdaw masat ninghtoi hta Myitkyina Wunpawng Shingni Hpung Ginjaw, Mungmyit Sinli Shingni Hpung hte Ja rit mayan Shingni hpung ni hpe mung saw shaga da ai lam chye lu ai.
