Jinghpaw Mungdaw Masat Nhtoi lam hte seng nna n-gun madun ai lamang galaw

72 lang na Jinghpaw mungdaw masat nhtoi hta Jinghpaw mung ngu ai ga si hpe Jinghpaw laika hku nlang ai sha, Myen laika hku lang ra ai ngu ai asuya matsun wa ai majaw, nra sharawng ai mungshawa masha ni kawn January shata praw 7  ya shani Myitkyina manau wang kaw n-gun madun lamang galaw ai lam chye lu ai.

Ndai lamang gaw labau hte seng ai rai nga ai, Jinghpaw mungdaw nhtoi gaw mi moi kaw nna nga nga sai re majaw, ndai hpe majoi shamat nmai ai, Jinghpaw mungdaw nhtoi hpe shamat wa ai majaw, ninghkap n-gun madun ai lam re nga nna, Sara Zukdaw Tsawm Naw tsun ai.

Lai wa sai December shata 23 ya shani Manau Htingnu kaw Jinghpaw mungdaw asuya kawn 72 lang na Jinghpaw mungdaw masat nhtoi hpe Jinghpaw laika hku nka ai sha, Myen laika hku sha, ka lang ra ai ngu tsun shana aming jahkrat ai lam nga ai hte ndai lamang hpe asuya kaw nna woi awn galaw sa wa na re majaw, shang chyinglau ai lam ni, dingbai dingna jaw ai lam ni nga wa yang, Upadi hte maren ahkyak la na lam seng ang ai mungdaw asuya kaw nna tsun sadi jaw wa ai lam nga ai.

Htunghking lam hpe asuya ni hku nna sa shang shalau nga ai lam, anhte a htungking manau wang re majaw, Jinghpaw laika nmai lang ai, Myen laika hku sha lang na ngu ai gaw n galaw ging ai, mungdan mying langai ngai hpe shamat wa ai masing hpe n galaw ging ai, mungdan a mying hpe galai na mung shanhte hta ahkaw ahkang nnga ai lam Sara Zukdaw Tsawm Naw matut tsun ai.

Shawa n-gun madun lamang hta mungshawa yawng marai 200 daram sa du shang lawm ai lam chye lu ai.

Photo; Myusha Pyen U