KIA hte Myen Hpyen Dap ni gasat gala majan byin
Mungmyit Sinli Ga (Kachin Sub-state) KIA Dap Ba 10, Dap Dung 17 ginra, Padang Bum kaw January shata 7 ya shani hkying 11:20am aten hta KIA hte Myen Hpyen Dap ni gasat gala majan byin ai lam chye lu ai.
Myen hpyen hpung ni gaw KIA Dap Dung 17 hpyen hpung ni shara la nga ai Padang Bum de Myen hpyen dap ni htu shadut lung wa ai majaw, gasat poi byin ai re lam shawng lam na shisawk ni shana wa ai kawn chye lu ai.
“January shata praw 8 ya shana maga hkying 5:00pm aten hta mung KIA Dap Ba 6, Dap Dung 9 ginra, Namhpakka kaw dap jung ai Hk.L.Y 123 dap ni gaw, 105mm ngu maram ai laknak kaba hte Manmau mare dingsa kawng maga de 3 lang gap bun ai” nga nna Namhpakka Sinpraw na Shadang Ja Di tsun dan ai.
Ya na zawn Myen hpyen dap ni laknak kaba gap ai majaw, hpyen dap makau hkan nga ai mungshawa dum nta ni ganan mat ai lam nga ai. Asak kaba sai dinggai dingla ni nga yak hkrit tsang ai sha n-ga nta kaw rem ai du sat yamnga ni mung kaga shara de nga mat ai, nga nna Shadang Ja Di matut tsun dan ai.
January shata praw 1 ya shani hta mung KIA Dap Ba 4, Dap Dung 8 ginra, Mung Wi hte Pang Kanai lapran kaw gasat gala majan byin ai re.
Ya aten hta KIA Dap Ba 2 hte Dap Ba 9 ginra de, Myen hpyen dap ni dap nnan jung jat na matu, hpyen n-gun laknak machyu pala ni shani shagu ngu na htaw lung nga ai lam chye lu ai.
