Wunli la chyeju shakawn akyu hpyi hpawng galaw

Wunpawng Mungdan Shanglawt Asuya, Htunghking hte Laili Laika Magam Dap ni a wunli la chyeju shakawn akyu hpyi hpawng hpe January shata 10 ya shani jahpawt hkying 10:00am aten hta Laiza Muklum, Sinpraw Majoi Gawknu kaw galaw ai lam chye lu ai.

Dai ni galaw ai lam gaw anhte magam dap hku nna yi langai jawm galaw ai hta gaja nan anhte hkai nna, mula shu la lu ai nlung nnan hpe chyeju shakawn jawmlu jawmsha wunli la chyeju shakawn akyu hpyi hpawng galaw ai hte Miwa Mung Jang Hong kaw ka manawt hpaji hpe sa sharin hkamla nna bai wa ai Sinpraw Majoi Htunghking shingni shayi shadang sha ni hpe hkap hkalum ai hte kapyawn let galaw ai re lam, Htunghking hte Laili Laika Magam Dap a sawkgin Makan Dap Matsun Du Saranum Kaba Nding Tawng Ra tsun ai.

Sinpraw Majoi Htunghking Shingni Hpung a yaw shada lam hpe Saranum Kaba Nding Tawng Ra matut tsun ai hta “Wunpawng amyusha ni hta Karai Kasang jaw tawn da ai Htunghking ningli, anhte a labau ma hkra hte anhte hkapla hkansa ai lam ni mahkra hpe kashu kasha ni gaw chye mai ai, jahkring mi sha gan hpaw nna jahkring mi gan shamat kau gan tawn kau ai hku nre sha, ding run ding yang galoi mung aten galu amyu langai mi hta nga taw ra ai ngu ai hpe masing ningpawt jahkrat nna galaw sa wa ai re” nga nna tsun ai.

Sinpraw Majoi Htunghking Shingni Hpung kaw na ramma marai 28 hpe laiwa sai November shata praw 1 ya shani kaw nna 2020 ning January shata praw 3 ya shani du hkra shata 2 tup, Miwa Gumsan Mungdan Jang Hong Htunghking Hpung Ginjaw kaw Wunpawng Htunghking ka hkrang hte kaga amyusha baw sang ni a ka hkrang hpan 9 hpe sa sharin hkamla lu ai lam chye lu ai.