Lahta Sammung, Mung Myit Sinli ginra hta gasat gala majan laja lana matut manoi byin nga

Mung Myit Sinli Ga ( Kachin Sub-State ) ginra Pu Wang hte Hpawng Seng mare lapran kaw November, 23 ya jahpawt hkying 6:45am aten kaw nna Myen hpyen dap Tatma ( 99 ) kata na hpyen hpung ni hte KIA Dap Dung ( 36, 38 ) na hpyen hpung ni

gasat gala majan laja lana byin ai lam chye lu ai.

MNDAA ( Kukang ) pawng hpawm hpyen hpung ni hte KIA Dap Dung ( 6 ) ni November, 23 ya jahpawt hkying 8:15am aten hta mung Nam Hpye mare makau kaw myen hpyen dap Hk.M.Y ( 14 ) na hpyen hpung ni hte gasat gala majan byin ai lam, dai hpang Munggu mare lawk ( 2 ) hte lawk ( 6 ) Myen Byu Ha rung jung ai shara kaw mung laja lana gasat gala majan byin ai lam chye lu ai.

Muse, 105 Mile kaw nna Pang Sai maga de hpyen garum sa wa ai Tank lawm ai Myen hpyen hpung ni hpe mung November, 23 ya jahpawt hkying 2:00am aten kaw nna hkying 5:30am aten du hkra lam dingyang bawm hte hkap shingla gasat ai hta Pang Sai Asia World Gate makau kaw Tank modo hpung ni hpe jahkring kau lu sai lam na chye lu ai.

Bai, November, 23 ya shana daw hta KIA Dap Ba ( 3 ) Dap Dung ( 27 ) ginra Gawk Ngu Yang kaw nga ai myen hpyen dap Hk.M.Y ( 602 ) na hpyen hpung ni hte KIA hpyen hpung ni gasat gala mjan byin ai hta Myen hpyen hpung ni yawng hprawng yen mat ai majaw KIA hpyen hpung ni kawn hkan shachyut shagrawt ai lam, dai hpang Loi Jau bum pawt mayan hku Helicopter nbungli ( 2 ) hte wa gap gasat garum ai lam hpe mung chye lu ai.

Dap Dung ( 27 ) ginra Bang Hkam kaw nga ai Myen hpyen hpung ni mung November, 22 ya shana kawn hprawng yen mat sai lam na chye lu ai.