Nawnghkying mare kaw yu ngwi pinra (fund show) lamang galaw na
Kahtawlik Shingni Hpung kaw nna, Waimaw Jau Ginwang, Nawnghkying Kahtawlik nawku jawng gawgap na matu, January shata 16 hte 17 ya shana hkying 6:00pm ten hta yu ngwi pinra (fund show) tam ai lamang hpe Nawnghkying Sing Pyi Ta nawku jawng wang kaw galaw na re lam chye lu ai.
“Ndai lamang hpe Nawnghkying Kahtawlik mare hpung masha ni hte Kahtawlik Shingni Hpung ni pawng nna fund show lamang galaw ai lam re” nga nna Sara Nkoi Tu Hkawng tsun ai.
Waimaw Jau Ginwang, Nawnghkying mare na kahtawlik nawku jawng gawgap na matu Fund tam ai lamang hta Wunpawng amyusha ni yawng alu jaw bang let, sa du yu n-gun jaw la mai ai lam, Sara Nkoi Tu Hkawng tsun ai.
Yu ngwi ninghkring ni gaw, Lana Naw Sam, Hkawang Yaw Han, Sabaw Brang, Nkoi Tu Hkawng, N-nye Seng Tu, Nahkan Nan Daw, Lar La (Jum), Aye Seng, Ah Sar, Maran Tsitku Chya, Lahtaw Dai Li, Gunhtang Kaw Shan, Lahkri Htu Shan, Marip Nu Nu Awng, Ja Seng Ing, Lahtaw Pri Ja, Kareng Hkawn Nan, L.San Ja hte Shagyi Ja Noi ni shanglawm shangwi shapyaw na re.
Alu lakmat hpe kyats 5000, 3000, 2000, hpan masum hku nna dut garan ya ai hta nlu bang ai ni gaw kyats 1000 hte shang yu mai ai lam chye lu ai.
