Mazut roi rip sat hkrum ai laika Sasana Saranum yan a amu manghkang, tengman ai mahtai lu na matu kyuhpyi hpawng galaw na
Mazut roi rip sat kau hkrum ai laika sasana Saranum Tangbau Hkawn Nan Tsin hte Saranum Maran Lu Ra yan a amu teng man ai mahtai lu la na matu du wa na January shata 19 ya shani Jinghpaw Wunpawng Hkalup Hpung Ginjaw a shangwang kata nga ginwang shagu, buga shagu hta akyuhpyi nawku dawjau hpawng galaw na matu KBC ginjaw kaw na matsun shana da ai lam nga ai hpe, KBC muna hkyithkai kaw na chye lu ai.
Du wa na January 19 ya shani gaw Saranum yan mazut roi rip sat kau hkrum ai 5 ning ladu hkrum sai re. Saranum yan a amu manghkang garai n ngut kre shi ai re majaw, tengman ai mahtai pru na matu myit mada nga dingyang rai nga ai hte maren, seng ang ai Komiti kaw nna mung amu hpe matut sawk sagawn nga dingyang naw rai nga ai lam KBC a ndau laika kaw na chye lu ai.
Kyuhpyi Hpawng lamang hpe Myitkyina hte makau grupyin kaw na hpungshawa ni gaw Jaw Bum, Nawng Nang mare kaw galaw sa wa na rai nna, Ginwang shara shagu hte Buga shara shagu hta mung akyuhpyi hpawng lamang hpe galaw sa wa na re lam chye lu ai.
Saranum yan gaw Lai wa sai 2015 ning January shata 19 ya shana Mungmyit Sinli Ga (Kachin Sub-state), Mungmau Ginwang Namtau buga, Kawnghka mare hta KBC hpaji sasana hta ap nawng taw nga ai ten, shan nga ai nta kaw nan mazut roi rip sat kau hkrum ai re.
