Zaiwa Myusha Mungshawa Zuphpawng galaw

Wunpawng Zaiwa Laili Laika hte Htunghkring Hpung Ginjaw kawn woi awn nhtawm, Zaiwa Myusha Mung shawa zuphpawng hpe Myitkyina Muklum Shatapru, Wunpawng Zaiwa Laili Laika hte Htunghkring Hpung Ginjaw (WZG) rung kaw January shata 18 shani galaw ai lam chye lu ai.

“Ndai  zuphpawng gaw Zaiwa Laili Laika hte Htunghkring hpe bai gaw sharawt ai, mu gun ningnan galai ai, masing bai gran ai, 4 ning hta kalang galaw ai zuphpawng re, 2020 ning hte 2023 ning htam hta, Wunpawng Zaiwa laili laika hte Htunghking Hpung rung magam gun ni hpe masha galai ai lam hte rung hkrang hpe bai jawm shading sharai ai, rung dap lakung, magam dap lakung bai  hpaw ai, bai gram lajang sa wa ai zuphpawng re”  nga nna Wunpawng Zaiwa Laili Laika hte Htunghkring Hpung Ginjaw Rung a Lit Hkam, Laili Laika sharin achyin Lit Hkam Sara Mahaw Awng Wang tsun ai.

Zuphpawng hta Komiti dap lakung hpaw ai, lawng lam bai jat ai lam, Komiti magam dap hta gadai ni mai shang lawm sai ngu ai komiti masha wa lata san ai lam, magam dap ni hpe woi awn na magam dap hpa-awn ni hpe lata san ai lam, gumhpraw jai hkrang hte seng ai lam ni hpe bawngban jahkum shatsup ai lam hte 2020 ning hte 2023 ning Wunpawng Zaiwa laili laika hte Htunghking Hpung hpe woi awn sa wa na ningbaw, amu madu, kunhting ni hpe lata san la ai lam ni hpe bawngban la lu sai re hpe chye lu ai.

Zuphpawng hta Mungshawa yawng marai 150 jan sa du shanglawm ai lam chye lu ai.