Rawt malan pawng hpawm hpyen hpung ni hte Myen hpyen hpung ni gasat gala majan matut byin nga
November, 27 ya shani hta mung, Mung Myit Sinli Ga ( Kachin Sub-State ) ginra, Nam Tau hte 105 Mile lapran kaw jahpawt hkying 6:00am aten daram hta Rawt malan pawng hpawm hpyen hpung ni hte
Myen hpyen hpung ni laja lana gasat gala majan byin ai lam chye lu ai.
Jahpawt hkying 7:00am aten hta gaw Hpai Kawng mare lahta Kawng Gwi bum myen hpyen dap kaw Myen hpyen hpung ni hte KIA hpyen hpung ni gasat gala majan byin ai lam chye lu ai.
Matut nna Mung Gu makau Man Jak Bum, Man Kang Bum, Nam Hpye hte Mung Lung mayan de mung gasat gala majan byin nna Myen hpyen hpung ni nbungli Jet Fighter (3), Helicopter (2) hte laja lana wa gap gasat ai lam chye lu ai.
Myen hpyen hpung ni gaw Hpai Kawng mare na gat seng ni, Hpaji jawng Jawng Up a nta hte Jawng Sara ni nga ai nta ni hpe mung adup malawng jahten kau nna arung arai ni hpe sawk la kau ai lam Hpai Kawng Mung shawa ni shana wa ai kawn chye lu ai.
KIA Dap Ba ( 3 ) Dap Dung ( 27 ) ginra Gawk Ngu Yang, Nam Hka Bum mayan kaw mung, Myen hpyen hpung ni hte KIA hpyen hpung ni November, 27 ya shana daw hkying 3:45pm aten daram hta gasat gala majan byin ai ai lam, dai hpang hkying 4:00pm aten hta gaw Myen hpyen ni nbungli Jet Fighter ( 2 ) hte bai wa gap gasat ai lam chye lu ai.
