Sammung ginra ni hta gasat gala laja lana matut byin
KIA Dap Ba ( 6 ) Dap Dung ( 9 ) ginra, Hku Mung, Nam Um hte Da Lung mare ni hta November, 30 ya jahpawt hkying 3:00am aten Myen hpyen hpung ni hte KIA hpyen hpung ni laja lana gasat gala majan byin nna hkying 1:30pm aten hta Man Jak Kawng, Bang Lum Bum hte Hka San Pawt maga de Myen hpyen hpung ni kawn
Jet Fighter ( 2 ) hte ( 6 ) lang sa htim gap ai lam chye lu ai.
Dai hpang, Sun Lung mahkrai makau kaw November, 30 ya shana daw hkying 1:25pm aten hta gasat gala majan byin nna November, 29 ya shani hkying 8:14am aten Myoma P.T.Ts, Myen Balik pawng hpawm hpyen hpung ni hte KIA hpyen hpung ni Muse mare, Hku Na lawk kaw gasat gala majan byin nga ai ten Cycle jawn lai wa ai Mung shawa langai hpe Myen Balik ni sinat hte hkan gap ai majaw lagaw hte lata hkra hkala mat ai lam mung chye lu ai.
KIA Dap Ba ( 6 ) Dap Dung ( 36 ) ginra, Bang Wan hte Nam Sawng hku kaw Dap Dung ( 36 ) zai ladat hpyen hpung ni nga ai shara de November, 30 ya jahpawt hkying 9:00am hte hkying 10:00am aten lapran Myen hpyen dap Tatma ( 22 ) kata na hpyen hpung ni htu shadut lung wa ai majaw gasat gala majan byin ai lam chye lu ai.
KIA ( 252 ) Dap Nawng Dap Dung ginra, Nhkram kaw nga ai Myen hpyen hpung ni November, 30 ya shana daw hkying 4:00pm aten hta Gidon hpyen dap de laknak kaba ( 52 ) lang gap bang ai majaw KIA hpyen hpung ni kawn laknak kaba ( 12 ) lang bai nhtang gap bun ai lam hte November ( 29 ) ya shani hkying 6:05pm aten kawn KIA Gidon hpyen dap de AA Gun hte aten ntam gap bun ai lam chye lu ai.
