Tanghpre Jau Ginwang Kahtawlik sasana shang ai 75 ning hpring Jubilee poi hte 23 lang na Nu Maria lung pu shagrau poi galaw na

Tanghpre Jau Ginwang Kahtawlik sasana shang ai 75 ning hpring lung seng Jubilee poi hte 23 lang na Nu Maria lung pu shagrau poi lamang hpe Myitkyina, Tanghpre mare kaw February shata 11 ya shani kaw nna 13 ya shani du hkra galaw na re lam chye lu ai.

Poi lamang hpe Tanghpre Jau Ginwang hte 2020 ning hta ningnan bai hpaw jat ai Alam Bum Jau Ginwang, Njang Yang Jau Ginwang, Jau ginwang 3 kaw magam gun nga ai Wa Jau ni hte ginwang kata kaw nga ai Ma Ma ni, tara hkaw Sara/num ni, hpung masha kanu kawa ni hte ramma ni kaw nna woi awn galaw ai re.

“Mali hka nu galoi mung dinggrin lwi nga lu na matu, Tanghpre mare mung ngang grin nga lu na matu, jet ai simsa lam mung lu wa na hte jet ai Federal mung hpawm mungdan hkamla lu na matu, Wunpawng amyusha ni yawng mahkri shawn let chye na hku hkau ai hte du shang du pru wa chye ai sumprat nshang wa lu na matu, amyusha ni yawng myit hkrum ai hte shawnglam let, Wa Karai Kasang a kashu kasha jet ai hte maren Karai Kasang a myitra ai lam hta hkawm sa lu na matu ndai poi lamang galaw ai re” nga nna Tanghpre Jau Ginwang Up Jau, Wa Jau Columban Supma Sut Awng tsun ai.

Poi lamang a matu 75 ning jubilee masat gawknu galaw ai lam, ngang kang ai yu ngwi pinra ni hte Jubilee hall ni hpe mung grau kaba hkra gram lajang ai lam galaw nga ai re hte kaga hkyen shajin ra ai lam ni hpe mung galaw nga sai lam, Wa Jau matut tsun ai.

Jubilee poi lamang hta February shata 11 ya shani gaw 23 lang na Nu Maria lung pu shagrau masat poi galaw na rai nhtawm, February shata 12 ya shani hta gaw Tanghpre Jau Ginwang Kahtawlik sasana shang ai 75 ning hpring lung seng Jubilee poi hpe galaw na rai nna, Manau nau ai lam hpe mung February shata 11 ya hte 12 ya shani, 2 ya tup nau na re lam, yu ngwi pinra lamang, Tsawm shayi shing jawng lamang hte buga hpung masha ni a ka hkrang lamang ni mung lawm na re lam chye lu ai.