Manmaw Ginwang hpung woi magam gun ni a Chyum laika sharin bawngban hpawng galaw

13^th lang na Manmaw Ginwang hpung woi magam gun Sara/num ni a Chyum laika sharin bawngban hpawng hpe Manmaw Roberts Masat Htingnu kaw January shata 28 ya shani kaw nna, 30 ya shani du hkra galaw sa wa na re lam chye lu ai.

Sharin hpawng hta 2020 ning na KBC a ga baw rai nga ai Hkristu a lanang hkap lu hkra myit hkrum let gawgap ga, Hpung woi shingni hte Shanglawt Karai Masa ngu ai ga baw ni hpe mahta nna sharin ya na rai nna, shana na aten hta lakjet, Special talk ni hpe sharin ya na re.

“Sharin Sara ni gaw Mandalay Buga hpung kaw na Rev. Dr. Jum Maw San Awng, Manmaw kaw na Dr. Labya Roi San, Kuthkai Chyum Jawng Up Rev. Dr. Lahtaw Zau Awng, Zinlum Hpung Up Rev. Jangmaw Gam Maw MSN (Makam Share Ninghkring) Special Talk, hte KBC Sara Magam Dap Hpa-awn Rev. Lashi La Ja ni sa du sharin ya ai re” nga nna Manmaw Ginwang Amu Madu tsun ai.

Sharin hpawng hta Manmaw Ginwang kata na buga hpung 43 kaw na hpung woi Sara/num ni yawng marai 200 daram sa du sharin hkamla nga ai lam chye lu ai.