Mung Myit Sinli Ga ( Kachin Sub-State ) ginra gasat gala majan
Mung Myit Sinli Ga ( Kachin Sub-State ) ginra hta Rawt malan Dap hpawm hpyen hpung ni hte Myen hpyen dap ni 2016 November, 20 ya shani kaw nna gasat gala majan byin wa ai gaw dai ni December, praw 2 ya du hkra
laja lana matut manoi byin nga ai lam chye lu ai.
December, praw 1 ya jahpawt hkying 8:10am aten hta gaw MNDAA, AA pawng hpawm hpyen hpung ni hte Myen hpyen hpung ni KIA Dap Ba ( 6 ), Dap Dung ( 36 ) ginra Mung Gu grup yin hta laja lana gasat gala majan byin ai lam, Gasat gala majan byin ai shara de Myen hpyen dap ni nbungli Jet Fighter ni hte laja lana wa gap gasat nhtawm Mung Gu mare kata de mung nbungli bom ni jahkrat bun ai lam chye lu ai.
KIA Dap Dung ( 38 ) ginra, Loi Jung Bum hte Lau Shang Chyai kaw nga ai Myen hpyen dap hpe mung December, praw 1 ya jahpawt hkying 5:30am aten daram hta KIA hpyen hpung ni sa htim gasat zing la ai lam chye lu ai.
Matut nna, KIA hpyen hpung ni hte Myen hpyen dap Tatma ( 99 ) kata na hpyen hpung ni December, praw 1 ya shani hkying 12:30pm aten daram hta Pang Sai kawn Yi Hku Bum de sa wa ai lam lapran gasat gala majan byin ai lam, dai hpang shana daw hkying 2:40pm aten hta mung Pang Sai kawn pru wa ai Myen hpyen hpung ni hpe KIA hpyen hpung ni shingla gasat ai lam chye lu ai.
105 Miles Myen hpyen dap hpe mung TNLA hpyen hpung ni December, 1 ya jahpawt hkying 6:00am aten daram kaw sa htim gap gasat ai lam chye lu ai.
Dai ni December, praw 2 ya shani hta mung, Mung Gu ginra ni hta Rawt malan Dap hpawm hpyen hpung ni hte Myen hpyen hpung ni gasat gala majan laja lana naw matut byin ai lam chye lu ai.
