Njang Yang Jinghpaw Wunpawng Htunghking hte Laili Laika Hpung Salang ni hte JHG Salang ni hkrum zup hpawng galaw

Njang Yang Jinghpaw Wunpawng Htunghking hte laili laika hpung Salang ni hte JHG Salang ni hkrum zup nna, Njang Yang Asuya jawng hta Jinghpaw laika sharin sa wa na lam hte seng nna, bawngban jahkrup ai lam hpe February shata praw 6 ya shani JHG rung kaw galaw ai lam na chye lu ai.

Asuya jawng kaw 2020 hte 2021 ning laika sharin ladaw hta Jinghpaw laika sharin ya lu na matu galaw sa wa na masing masa lam ni hpe bawngban ai rai nna, Asuya jawng hta jinghpaw laika sharin ya na matu jawng Sara/num ni hpe shalat na lam ni hte seng nna bawngban la lu sai lam JHG Ningbaw Du wa Htingnan Yaw Sam tsun ai.

“Asuya jawng ni hta Jinghpaw laika hpe sharin lu na matu hte Asuya jawng ni hta jinghpaw laika lu sharin ya lu jang she jinghpaw mung kata kaw nga ai Wunpawng amyusha ni yawng jinghpaw laika chye wa nna, jinghpaw laika jinghpaw ga hpe pawng hpawm laika, rung laika hku nna jai lang wa lu na matu yaw shada ai re” nga nna JHG ningbaw Du Wa Htingnan Yaw Sam tsun ai.

Bawngban hpawng hpe numdaw langai lang bawngban ai hta Htunghking hte seng ai lam hpe bawngban ai rai nna, ndai kalang bawngban ai hta gaw jinghpaw laika hpe Asuya jawng ni hta sharin na matu madung bawngban ai re hpe mung chye lu ai.

JHG kaw nna mung sharin Sara tai na ni hpe Sara tai sharin ladat nnan ni hte sharin sara shalat ai lam galaw na rai nna, Asuya kaw na hpaji dap ni, Ninghtawn kaw na seng ang ai ni hte mungdaw Hpaji Du ni hte jahkrup nna jinghpaw laika sharin Sara/num ni hpe mung tara shang Asuya jawng Sara magam gun ni tai wa lu na matu bawngban jahkrup ai lam ni galaw ai re lam chye lu ai.

Photo; JHG News Kachin State